کمٹہ،16؍ستمبر (ایس او نیوز) کمٹہ میں کورونا کے بڑھتے ہوئے معاملات اور کئی دکاندار اس مرض کا شکار ہونے کے پس منظر میں غذائی اجناس کے تاجروں نے آج 16ستمبر سے ایک ہفتے تک اپنے طور پر ہی دکانیں بند رکھنے کا فیصلہ کیا تھا۔ لیکن عوامی مفاد کے پیش نظر اسسٹنٹ کمشنر اجیت نے اس معاملے میں مداخلت کرتے ہوئے دکانداروں کودکانیں بند کرنے کا فیصلہ واپس لینے   پر آمادہ کرلیا ہے ۔

موصولہ رپورٹ کے مطابق تاجروں کی تنظیم کے صدر کو ہی کووڈ کا مرض لاگو ہوا ہے۔کچھ دیگر دکاندار بھی  اس مرض کا شکار ہوگئے ہیں۔ اس کے علاوہ شہر میں دن بدن متاثرین کی تعداد بڑھتی جارہی ہے۔ اس سے پریشان ہوکرتاجروں نے اپنی دکانیں ایک ہفتے کے لئے بندر کھنے کا فیصلہ کیا تھا۔لیکن اسسٹنٹ کمشنر نے دکانداروں کی تنظیم کے سیکریٹری اور دیگر عہدیداروں کے ساتھ میٹنگ کرکے انہیں یہ بات سمجھائی کہ کورونا پر قابو پانے کے لئے ان کی طرف سے ایک ہفتے تک دکانیں بندر کھنے اور پھر اس کے بعد کھولنے سے کوئی خاص فائدہ ہونے والا نہیں ہے۔ یہ ایک غیر سائنٹفک اقدام ہوگا۔ جبکہ کورونا کی روک تھام کے لئے ماسک اور ہاتھوں پر گلؤز پہننے ، آپس میں سماجی دوری بنائے رکھنے جیسی ہدایات پر سختی کے ساتھ عمل کرنے سے کورونا پر قابو پایا جاسکتا ہے۔دکانداروں کو چاہیے کہ  ان ہدایات پر سختی سے عمل کرنے کے لئے گاہکوں کوسمجھائیں اور ماسک نہ پہننے والوں کو اپنی دکان سے سامان فروخت نہ کریں۔اس سلسلے میں نگرانی کرنے کے لئے اسسٹنٹ کمشنر نے بلدیہ افسران کو نگرانی کرنے کی ہدایات بھی جاری کی  ہیں۔اسسٹنٹ کمشنر کی فہمائش کے بعد دکانداروں نے ازخود لاک ڈاؤن کا فیصلہ واپس لے لیا۔