بھٹکل 12 مئی (ایس او نیوز) بھٹکل اور کمٹہ سمیت پڑوسی ضلع اُڈپی، دکشن کنڑا اور پڑوسی ریاست کیرالہ میں آج بدھ کو رمضان کے تیس روزے مکمل ہوگئے جس کے ساتھ ہی کل جمعرات کو ان علاقوں میں عیدالفطر منائی جائے گی۔ جبکہ ملک کے دوسرے حصوں میں آج 29 روزے مکمل ہورہے ہیں اوراگر آج شام کو چاند نظر آتا ہے تو ملک کے دیگر حصوں میں بھی کل جمعرات کوہی عیدالفطر منائی جائے گی۔
یاد رہےکہ ساحلی کرناٹک کے بعض علاقوں سمیت کیرالہ میں کل بدھ کو 29 روزے مکمل ہونے پر چاند دیکھنے کی کوشش کی گئی تھی مگر کہیں پر بھی چاند نظر نہیں آیا، جس کے بعد مینگلور، اُڈپی اور بھٹکل سمیت کیرالہ کے قاضی صاحبان نے اعلان کیا تھا کہ پورے تیس روزے مکمل کئے جائیں گے ،اور جمعرات کو عید منائی جائے گی۔ بھٹکل کے ساتھ ساتھ کمٹہ میں بھی کل جمعرات کو ہی عید الفطر منائی جائے گی۔
ان علاقوں کے ساتھ ساتھ گلف بالخصوص دبئی، سعودی عربیہ وغیرہ میں بھی کل جمعرات کو ہی عید الفطر منائے جانے کا اعلان ہوچکا ہے۔
مساجد میں نماز کی اجازت نہیں ملی: تنظیم کی طرف سے بدھ کو ایک پریس میٹ میں جامع مساجد میں عید الفطر کی نماز کی ادائیگی کے لئے انتظامیہ سے مطالبہ کئے جانے کی بات کہی گئی تھی، اس تعلق سے تنظیم نے آج واضح کیا ہے کہ انتظامیہ کی طرف سے مساجد میں عید الفطر کی نماز کی ادائیگی کی اجازت نہیں ملی ہے ۔ اس ضمن میں بھٹکل کے قاضی صاحبان مولانا عبدالرب خطیبی ندوی اور مولانا خواجہ معین الدین اکرمی مدنی نے مسلمانوں کو ہدایات جاری کی ہیں جس میں انہوں نے کہا ہے کہ مسلمان اپنی اپنی جگہوں پر ہی عید کی نماز ادا کریں اور مسجدوں میں جمع ہوکر بھیڑ جمع کرنے کی کوشش نہ کریں۔ اپنے پیغام میں قاضی صاحبان نے تمام مسلمانوں کو عید کی پُرخلوص مبارکباد پیش کی ہے۔