بھٹکل کے قریب مرڈیشور میں ٹپر نے دیا ڈیزل سے بھری ٹینکر کو ٹکر؛ ڈیزل روڈ پر بکھر گیا، کئی لوگوں نے بھرے اپنے اپنے کین
بھٹکل 3/جون (ایس او نیوز) ڈیزل سے بھری ٹینکر کو پیچھے سے ٹپّر لاری نے ٹکر دے ماری جس کے نتیجے میں ٹینکر سے ڈیزل رسنا شروع ہوگیا، واردات بھٹکل کے مرڈیشور کے قریب ترن مکّی نیشنل ہائی وے 66 پر پیر کی دوپہر قریب ڈھائی بجے پیش آئی۔
ٹینکر کو ٹکر لگتے ہی ٹینک کا ایک حصہ پھٹ گیا، جس سے ڈیزل روڈ پر ہی گرنا شروع ہوگیا، قریب میں موجود لوگوں نے اس موقع کا بھرپور فائدہ اُٹھاتے ہوئے گھروں سے بالٹیاں، کین اور پلاسٹک ڈبے وغیرہ لے کر آ گئے اور نیچے گرتے ڈیزل کو اپنے اپنے برتنوں میں بھرنا شروع کردیا۔ لیکن کافی مقدار میں ڈیزل روڈ پر بہہ کر ضائع ہوگیا۔
واقعے کی اطلاع ملتے ہی مرڈیشور پولس اور فائر بریگیڈ کا عملہ موقع پر پہنچ گیا اورحفاظتی اقدامات کے طور پر لوگوں کو وہاں سے ہٹادیا اور ضروری حفاظتی تدابیر کی طرف غور کیا گیا۔ ڈیزل اتنی مقدار میں روڈ پر بہہ گیا تھا کہ غلطی سے بھی جلا ہوا سگریٹ اُس پر گرتا تو تباہی مچ سکتی تھی۔ لیکن پولس نے فوری طور پر پورے احاطے کو گھیر لیا تھا۔
بعد میں سرکل پولس انسپکٹر گنیش نے بتایا کہ پولس نے عارضی طور پر ٹینکر کی مرمت کی اور ڈیزل کو مزید ضائع ہونے سے روک دیا۔ انہوں نے بتایا کہ ڈیزل سے بھری ٹینکر مینگلور سے سرسی پٹرول پمپ جارہی تھی جس کے دوران یہ حادثہ پیش آیا۔ حادثے میں کسی کو چوٹ نہیں آئی ۔
خیال رہے کہ ایک ٹینکر میں تین حصے ہوتے ہیں اور جملہ 12 ہزارلیٹر ڈیزل رکھا جاتا ہے۔ انسپکٹر گنیش نے بتایا کہ ٹپر کی ٹکر سے ایک حصے کو نقصان پہنچا جس کے نتیجے میں متعلقہ حصے سے قریب آدھا ڈیزل یعنی کم و بیش 2 ہزار لیٹر ڈیزل ضائع ہوگیا ۔
فائر بریگیڈکی مدد سے بعد میں کافی مقدار میں صابون والا پانی روڈ پر بہاکر سڑک کو صاف کیا گیا۔
