منڈگوڈ : دس دن پہلے ہوئی ہے بدھسٹ بھکشو کی موت - آخری رسومات کے بغیر کی جارہی ہے پوجا
منڈگوڈ ،21؍ ستمبر (ایس او نیوز) یہاں کے تبتی کالونی کے ایک کیمپ میں ایک بزرگ بدھسٹ بھکشو کی موت کو دس دن کا عرصہ گزر چکا ہے مگر بدھسٹ عقیدے کے مطابق ابھی تک اس کے جسم سے روح الگ نہ ہونے کی بات کہہ کر لاش کی پوجا کی جارہی ہے اور آخری رسومات کی ادائیگی کے لئے جسم سے روح پوری طرح نکل جانے کا انتظار کیا جارہا ہے ۔
بتایا جاتا ہے کہ تبتی کیمپ کے ایک کمرے میں 9 ستمبر کو ایشی پونتسو کا 90 سال کی عمر میں انتقال ہوگیا ۔ مگر سینئر بھکشووں نے اس کے جسم کے بالکل اندر روح موجود ہونے کی بات کہی ہے اور ایک پلنگ پر لیٹی ہوئی حالت میں پڑی اس لاش کی مسلسل پوجا کی جارہی ہے ۔ صرف کچھ سینئر بھکشو ہی وقفہ وقفہ سے کمرے کے اندر جا کر معائنہ کرتے ہیں کہ اس مردہ جسم سے روح پرواز کرگئی ہے یا نہیں ۔ بھکشووں کا عقیدہ ہے کہ جسم کی موت ہونے کے بعد بھی "حساس روح" جسم کے اندر موجود رہتی ہے اور جب تک وہ جسم میں جدا نہیں ہوتی تب تک لاش کی آخری رسومات انجام نہیں دی جاتیں ۔