لکھیم پور کھیری تشدد کے مزیدتین ملزم گرفتار
لکھیم پور کھیری24اکتوبر(آئی این ایس انڈیا)خصوصی تحقیقاتی ٹیم (ایس آئی ٹی) نے ہفتہ کے روز لکھیم پور کھیری ضلع کے ٹکونیا علاقہ میں 3 اکتوبر کو ہوئے تشدد کے تین مزید ملزمین کو گرفتار کیا جس میں چار کسانوں سمیت آٹھ افراد ہلاک ہوگئے تھے۔ پولیس نے یہ معلومات دی ہیں۔پولیس کے مطابق اس معاملے میں اب تک کل 13 ملزمان کو گرفتار کیا جا چکا ہے۔ایک سینئر پولیس اہلکار نے بتایاہے کہ گرفتار ملزمان کی شناخت سنگھی ٹاؤن کے موہت ترویدی، ٹکونیا کوتوالی علاقے کے رنکو رانا اور دھرمیندر سنگھ کے طور پر کی گئی ہے۔افسرنے بتایاہے کہ پولیس حراست میں دیگر ملزمان سے پوچھ گچھ کے دوران ان کے نام سامنے آئے جس کے بعد انہیں گرفتار کیا گیا۔ انہوں نے کہاہے کہ تینوں ملزمان کو آج عدالت میں پیش کیا جائے گا اور تفتیش کار مزید تفتیش کے لیے عدالت سے ان کی 14 روزہ پولیس تحویل مانگیں گے۔مرکزی وزیر مملکت برائے داخلہ اجے کمار مشرا ٹینی کا بیٹا آشیش مشرا عرف مونو اس معاملے میں اہم ملزم ہے۔ آشیش مشرا عرف مونو جنہیں 9 اکتوبر کو گرفتار کیا گیا تھا، فی الحال پولیس حراست میں ہیں۔ اس معاملے میں اب تک گرفتارکیے فئے دیگر ملزمان میں بی جے پی وارڈ ممبر سمت جیسوال، انکیت داس،کالے، شیکھر بھارتی، شیشو پال، ستیہ پرکاش ترپاٹھی عرف ستیام، نندن سنگھ بشٹ، آشیش پانڈے اور لاکوش رانا شامل ہیں۔آشیش پانڈے اور لاوکوش رانا کے علاوہ دیگر سات ملزمین کو بھی پولیس نے پوچھ گچھ کے لیے عدالت کی اجازت کے بعد اپنی تحویل میں لے لیا ہے۔ اتوارکی شام ان کی پولیس تحویل ختم ہو جائے گی۔