منگلورو: مدرسہ کی طالبات کے ساتھ جنسی ہراسانی اور اغوا کی کوشش۔ 3ملزمین گرفتار
منگلورو12/فروری(ایس او نیوز) کوناجے پولیس اسٹیشن کے افسران نے مدرسہ کے لئے جارہی طالبات کو راستہ روک کراغوا، جنسی ہراسانی اورعصمت دری کی کوشش کرنے کے الزام میں تین لوگوں کوگرفتار کرلیا ہے۔
موصولہ رپورٹ کے مطابق ملزمین کی شناخت کرن کمار(26سال)،گوناپال(25سال) اور سبھاش (29سال) کے طور پر کی گئی ہے۔ طالبات کے والدین کی جانب سے کوناجے پولیس اسٹیشن میں درج کی گئی شکایت کے مطابق پوور گاؤں میں ملارا کے پاس واقع مدرسہ میں زیر تعلیم تین طالبات جب صبح میں مدرسے کے لئے جارہی تھیں تو ملار اپُل کے پاس تین لوگ بیٹھے ہوئے تھے۔ انہوں نے لڑکیوں سے اوگّانابیل کی طرف جانے کا راستہ پوچھا تو لڑکیوں نے راستے کی سمت بتادی۔ اس دوران ان میں سے ایک لڑکے نے ایک طالبہ کا ہاتھ بڑی مضبوطی سے پکڑ لیاتو طالبہ نے اس کے ہاتھ کو اپنے دانتوں سے کاٹ دیا اور خود کو چھڑا کر مدرسے کی طرف بھاگ گئی اور وہاں کے ذمہ داران کو اس کی اطلاع کردی۔ دوسری طرف بقیہ دو لڑکیوں کو ملزمین نے پکڑ لیا او ران کے ساتھ جسمانی طورپر ناشائستہ حرکتیں کیں اور انہیں جان سے مارنے کی دھمکی دے کر وہاں سے فرار ہوگئے۔
واقعہ کی اطلا ع ملنے پر پولیس نے ملزمین کو پکڑنے کے لئے جال بچھادیا۔ اس دورا ن مقامی عوام کی ایک بہت بڑی تعداد جمع ہوگئی اور ملزمین کو فوری طور پر گرفتار کرنے کا مطالبہ کرنے لگے۔تحقیقات کے دوران جب پولیس کو خبر ملی کہ ملزمین اوگانابیل میں موجود ہیں تو انہیں گرفتار کرنے کی پولیس ٹیم وہاں پہنچی۔ تینوں ملزمین نے موقع پر سے فرار ہونے کی کوشش کی مگر دو ملزمین کو پولیس نے گرفتار کرلیا اور پھر تیسرے ملزم کو ونٹے مار نیرمارگا کے پاس سے گرفتار کرلیا گیا۔ پولیس نے گاؤں میں حفاظتی چوکسی بڑھا دی ہے۔
پولیس نے ملزمین پر اغوا، عصمت دری کی کوشش، قتل کرنے کی کوشش کے علاوہ پوکسو ایکٹ کے تحت کیس درج کردیا ہے۔