لکھنو میں منعقدہ آل انڈیا مدرسہ اتھلیٹک چمپئن شپ میں بھٹکل کے تین طلبا کا شاندار پرفارمینس
بھٹکل 5/مارچ (ایس او نیوز) لکھنو میں منعقدہ آل انڈیا مدرسہ اتھلیٹک چمپئن شپ مقابلوں میں بھٹکل اور اطراف کے طلبا نے شاندار پرفارمینس پیش کرتے ہوئے اسپورٹس میں بھی اپنی صلاحیتوں کا لوہا منوانے میں کامیاب ہوگئے ہیں۔
بھٹکل کے قریبی علاقہ منکی کا طالب العلم عرش احمد ابن مختار احمد باپو نے سو میٹر دوڑ مقابلے میں اول مقام حاصل کرتے ہوئے گولڈ میڈل سے سرفراز ہوا تو لانگ جمپ میں یہی طالب العلم برانز میڈل کا بھی حقدار قرار پایا۔ اس کی شاندار پرفارمینس کو دیکھتے ہوئے اسے بیسٹ اتھلیٹ کی سند سے بھی نوازا گیا۔
بھٹکل کے زُہیر آرمار ابن زُبیر آرمار نے شارٹ پُٹ میں بہترین کارکردگی کا مظاہرہ کرتے ہوئے گولڈ میڈل حاصل کیا، اسی طرح بھٹکل کے سُفیان ابن سلمان نے لونگ جمپ میں تیسرا مقام حاصل کرتے ہوئے برانز میڈل لینے میں کامیاب رہا۔
ذرائع سے ملی اطلاع کے مطابق مدرسہ کے طلبا کے لئے منعقدہ اتھلیٹک مقابلوں میں ملک بھر کے 13 مدرسوں سے جملہ 350 طلبا نے حصہ لیا تھا، جس میں ندوۃ العلماء لکھنو میں زیر تعلیم بھٹکل اور اطراف کے جملہ آٹھ طلبا بھی شامل تھے۔
عرش، زُہیر اور سفیان تینوں بھٹکل جامعہ اسلامیہ سے فارغ ہونے کے بعد اب ندوۃ العلماء لکھنو میں فضیلت اول کے طالب العلم ہیں۔
ان کی کامیابی پر بھٹکل کی کئی جماعتوں ، اداروں اور اسپورٹس سینٹروں کی جانب سے انہیں مبارکباد پیش کی گئی ہے۔
