بھٹکل میں زیر تعمیر عمارت کی ٹائلس چوری کے معاملے میں تین گرفتار؛ چوری کیا ہوا مال برآمد
بھٹکل 4/اگست (ایس او نیوز) یہاں قدوائی روڈ پر زیر تعمیر اپارٹمنٹ کے ٹائلس اور دیگر اشیاء کی چوری کے الزام میں پولس نے تین لوگوں کو گرفتار کرلیا ہے اور چوری کیا ہوا مال برآمد کرلیا ہے۔ گرفتار شدگان کی شناخت بھٹکل کے ہیبلے کا رہنے والا یوگیش دیواڑیگا (28)، تلاند کا رہنے والا چیتن نائک (20) اور تلاند کا ہی رہنے والا راجیش نائک (22) کی حیثیت سے کی گئی ہے۔
بتایا گیا ہے کہ قریب ایک ماہ قبل قدوائی روڈ پر واقع ایک چار مالہ اپارٹمنٹ کی تعمیر کے لئے رکھے گئے قریب ڈھائی لاکھ مالیت کے 150 بوکس ٹائلس ، سیمنٹ کے کئی تھیلے اور الیکٹرک وائرس کے کئی بنڈل چوری ہوگئے تھے، اس تعلق سے کنٹریکٹر اسماعیل جوباپو نے بھٹکل ٹاون پولس تھانہ میں شکایت درج کرائی تھی، اُسی پر کاروائی کرتے ہوئے پولس نے آج اتوار کو تین لوگوں گرفتار کر لیا اور تینوں کو عدالت میں پیش کردیا ۔
بتایا جارہا ہے کہ چوری کے معاملے میں پولس کو مُنڈلی کے ناگراج اور مُٹھلی کے رگھو کی بھی تلاش تھی ، اطلاع ملی ہے کہ گرفتاری سے پہلے ہی ان دونوں نے عدالت سے رجوع ہوکر ضمانت حاصل کرلی ہے۔
ذرائع سے ملی اطلاع کے مطابق ناگراج قریب آٹھ سالوں سے کنٹریکٹر اسماعیل کے پاس ہی کام کرتا تھا، البتہ دو ماہ قبل اسے نوکری سے نکالا گیا تھا، جس کے کچھ ہی دن بعد اس نے متعلقہ اپارٹمنٹ میں اسٹاک کرکے رکھے ہوئے ٹائلس اور دیگر اشیاء کی چوری کی تھی اور کسی اور کو فروخت کردیا تھا، بتایا گیا ہے کہ دیگر گرفتارشدگان نے چوری کرنے اور چوری کئے ہوئے مال کو فروخت کرنے میں تعاون کیا تھا۔
بھٹکل سرکل پولس انسپکٹر کے ایل گنیش کی قیادت میں پولس نے چوری کی ہوئی تقریبا تمام چیزوں کو برآمد کرلیا ہے ، مزید چھان بین جاری ہے۔
