روی داس مندر گرائے جانے کے خلاف دلت کمیونٹی کے ہزاروں لوگوں نے کیامظاہرہ
نئی دہلی،22اگست (ایس او نیوز؍آئی این ایس انڈیا) شہر میں حال ہی میں ایک روی داس مندر کو گرائے جانے کی مخالفت میں ملک کے مختلف حصوں سے آئے دلت کمیونٹی کے لوگوں نے ہاتھوں میں نیلے رنگ کے جھنڈے لے کر جھنڈے والان سے رام لیلا میدان تک بدھ کو احتجاجی مظاہرہ کیا۔دہلی ڈیولپمنٹ اتھارٹی (ڈی ڈی اے) نے سپریم کورٹ کے حکم پر 10 اگست کو مندر گرا دیا تھا۔مظاہرین نے مرکزی حکومت سے دوبارہ مندر بنانے کا مطالبہ کیا۔پنجاب، راجستھان، ہریانہ، اتر پردیش اور دیگر ریاستوں سے آئے مظاہرین ’جے بھیم‘ کے نعرے لگا رہے تھے۔انہوں نے حکومت سے مطالبہ کیا کہ متعلقہ زمین دلت کمیونٹی کے حوالے کر دی جائے اور مندر دوبارہ بنوایا جائے۔یہ معاملہ سیاسی رنگ اختیار کر چکا ہے کیونکہ کئی سیاسی پارٹیاں تغلق آباد کے متعلقہ مقام پر یا کسی دوسرے اختیاری مقام پر مندر بنوانے کا مطالبہ کر رہی ہیں۔اسی معاملے پر 13 اگست کو پنجاب میں دلت کمیونٹی نے مظاہرہ کیا تھا۔اس مظاہرہ میں دہلی کے سماجی انصاف کے وزیر راجندر پال گوتم، بھیم آرمی سربراہ چندر شیکھر آزاد اور اس کمیونٹی کے روحانی لیڈر موجود تھے۔