بنگلور 21 جنوری (ایس او نیوز) ریاست کرناٹک میں سنیچر اور اتوار کو نافذ کیا گیا ویک اینڈ کرفیو اب ہٹادیا گیا ہے، تاہم رات دس بجے سے صبح پانچ بجے تک والا نائٹ کرفیو جاری رہے گا۔

جمعہ کو بنگلور میں منعقدہ وزیراعلیٰ بسواراج بومئی کی صدارت میں ماہرین اور وزرا کی اعلی سطی اجلاس میں ریاست میں کووڈ کی صورتحال سے نمٹنے کیلئے مختلف فیصلے کئے گئے جس میں یہ بھی  طے پایا گیا کہ  شدید کووڈ متاثر مریضوں کو ہی اسپتال میں داخل کرکے علاج کیا جائے گا اور ہلکے اثرات والے مریضوں کو ہوم کوارنٹین کرنے کی ہدایت دی جائے گی۔ 

میٹنگ میں بتایا گیا کہ فی الحال اسپتال میں کووڈ کے مریضوں کے بھرتی ہونے کی شرح قریب پانچ فیصد ہے، اگریہ تعداد بڑھتی ہے تو آئندہ کرفیو دوبارہ نافذ کیا جاسکتا ہے۔

اس موقع پرروینو وزیر نے عوام سے اپیل کی  کہ وہ کووڈ کے رہنما خطوط اور احتیاطی تدابیر پر عمل کریں اور ویکینڈ کرفیو واپس نافذ کرنے کا موقع نہ دیں۔

آر اشوک نے بتایا کہ متعدد سیاسی لیڈران،سماجی اداروں کے ذمہ داران اور عوام کا ایک بڑا طبقہ ویکینڈ کرفیو کو ہٹانے کا مطالبہ کررہا تھا، مگر ہم نے ماہرین کے صلاح و مشورہ پر ویکیند کرفیوں کو ہٹانے کا فیصلہ لیا ہے۔  تاہم، رات 10 بجے سے صبح 5 بجے تک ہر روز رات کا کرفیو جاری رہے گا۔ انہوں نے یہ بھی بتایا کہ  احتجاج، ریلیوں، میلوں اور تقریبات پر پابندیاں برقرار رہیں گی۔ اسی طرح جیم، مالس اور تھیٹر وغیرہ میں 50 فیصد لوگوں کی گنجائش کے ساتھ اوپن رکھنے کی اجازت ہوگی۔

اس موقع پرایجوکیشن منسٹر بی سی ناگیش نے بتایا کہ چونکہ بنگلور میں پوزیٹیو معاملات کی شرح کافی زیادہ ہے اس مناسبت سے بنگلور میں اسکول اور کالجوں کو مزید بند  رکھا جائے گا۔