بھٹکل میں ایک ساتھ تین دکانوں اور ایک مکان میں چوری کی واردات؛ نقد رقم سمیت زیورات پر بھی ہاتھ صاف
بھٹکل 8 ستمبر (ایس او نیوز) بھٹکل میونسپل حدود کے ماری کٹہ میں ایک ساتھ تین دکانوں سمیت ایک مکان میں چوری کی واردات پیش آئی جس میں چوروں نے دکانوں سے نقد رقم اور بعض قیمتی برقعے تو وہیں لاک شدہ گھر کے اندر بھی گھس کر زیورات سمیت نقد رقم لے کر فرار ہوگئے ہیں۔
سی سی ٹی وی کیمرے کی فوٹیج کے مطابق چوری کی واردات رات ساڑھے تین بجے کے قریب پیش آئی۔
پتہ چلا ہے کہ برقعہ کی ایک دکان سے قریب 30 ہزار روپیہ نقد سمیت برقعے اور دیگر چیزوں کی چوری ہوئی ہے۔ دوسری ایک دکان سے بھی قریب دس ہزار نقد اور کچھ مال چوری ہوا ہے، تیسری دکان میں چوروں کو غالباً کچھ نہیں مل سکا، البتہ ان دکانوں کے قریب واقع ایک بند مکان میں بھی گھس کر چوروں نے سونے کے دو چین، تین رِنگ، کان میں پہننے کے زیورات وغیرہ کے ساتھ ساتھ دس ہزار روپیہ نقد رقم پر بھی ہاتھ صاف کردیا ہے۔
پتہ چلا ہے کہ چور دکان کے شٹر کو لوہے کی سلاخ کی مدد سے توڑ کر اندر داخل ہوئے، جبکہ مکان میں چونکہ تالہ لگا ہوا تھا، تالہ توڑ کر اندر داخل ہوئے ہیں اور چوری کی واردات انجام دی ہے۔ ویسے تو چوروں نے بعض سی سی ٹی وی کیمروں کا رُخ تبدیل کیا ہے، لیکن بعض کیمروں میں چوری کی واردات کی تصاویر قید ہوگئی ہیں۔
پولس نے جائے وقوع پر پہنچ کر تفصیلات حاصل کیں ہیں اور سی سی ٹی وی فوٹیج کی مدد سے چوروں کا پتہ لگانے کی کوشش کی جارہی ہے۔
مقامی لوگوں نے بتایا کہ ماری کٹہ میں کئی جگہوں پر پولس کی جانب سے سی سی ٹی وی کیمرے لگائے گئے ہیں اور پولس اگر چاہے تو چوروں کا جلد سے جلد پتہ لگایاجاسکتا ہے۔
