بھٹکل 6/فروری (ایس او نیوز) یہاں ماری کٹہ کے قریب واقع ایک موبائل دکان پر چوری کی واردات پیش آئی ہے جس میں چوروں نے ایک منٹ سے بھی کم وقت میں شٹر توڑنے کے بعد اگلے دو منٹوں میں دکان کے اندر موجود قیمتی موبائل اور دیگر لوازمات سمیت ڈھائی ہزار نقد رقم بھی لے کر فرار ہوگئے ہیں۔ ایک اندازے کے مطابق دو لاکھ سے بھی زائد مالیت کی چوری ہوئی ہے۔
ماری کٹہ کے قریب مین روڈ پر واقع تحسین سوپر مارکٹ کے داخلی گیٹ کے قریب واقع موبائل کی چھوٹی سی دکان پر چوری کی واردات رات قریب 3:45 بجے پیش آئی۔ سوپر مارکٹ کے باہر لگے سی سی ٹی وی کیمرے میں قید وڈیو میں دیکھا گیا ہے کہ بدھ اور جمعرات کی درمیانی رات 3:38 بجے ایک سفید رنگ کی سویفٹ کار جائے واردات پر پہنچتی ہے، جس میں سے پہلے ایک شخص کپڑے سے منہ کو ڈھانپتے ہوئے دکان کی طرف بڑھتا ہے ، بعد میں کار پرسوار مزید دو لوگ بھی اُترتے ہیں اور تین منٹ کے اندر اندر چوری کرکے اُسی کار پر سوار ہوکر فرار ہوجاتے ہیں۔
دکان مالک ضیاء اللہ عسکری نے بتایا کہ دکان پر بعض بے حد قیمتی موبائل تھے، جبکہ مرمت کے لئے آئے ہوئے بھی کافی موبائل تھے، اسی طرح موبائل کے پارٹس اور دیگر لوازمات پر بھی ہاتھ صاف کیا گیا ہے۔
بھٹکل ٹاون پولس تھانہ میں چوری کے تعلق سے شکایت درج کرائی گئی ہے اور پولس اہلکاروں نے جائے وقوع پر پہنچ کر جائزہ لیا ہے۔ بتایا گیا ہے کہ چھان بین کے لئے پولس نے سی سی ٹی وی فوٹیج بھی اپنے ساتھ لے گئی ہے۔