بھٹکل 25 اکتوبر(ایس او نیوز) تعلقہ کے ہیبلے پنچایت حدود کے فردوس نگر میں ایک مکان میں چوری کی واردات پیش  آئی ہے جس میں چوروں نے گھر کے کھپریل نکال کر اندر داخل ہوئے ہیں اور  نقد رقم قریب 30 ہزار روپیہ لے کر  فرار ہوگئے ہیں۔

فردوس نگر، جامعہ آباد روڈ پر واقع سید ابراہیم  کی ملکیت والا یہ مکان  کافی دنوں سے بند تھا کیونکہ ان کی ساس کمٹہ اسپتال میں زیرعلاج ہے،  مگر گھر کے افراد  وقتاً فوقتاً گھر  آتے رہتے تھے۔ بتایا گیا ہے کہ جمعہ کے روز بھی  گھر کے لوگ آکر گئے تھے، جس کے بعد آج اتوار شام قریب 8:30 بجے گھر آئے تو  چوری کا معاملہ سامنے آیا۔ دونوں بیڈ روم میں واقع الماریاں کھلی ہوئی تھیں اور پورا سامان بکھرا پڑا تھا۔

اندازہ لگایا گیا ہے کہ کیچن روم کی  چھت سے کھپریل نکال کر چور اندر داخل ہوئے ہیں پھر الماری میں رکھی ہوئی رقم سمیت ڈبوں میں رکھی ہوئی رقم بھی لے کر فرار ہوگئے ہیں۔  گھر والوں نے بتایا کہ سونے کے زیورات وغیرہ گھر پر نہیں رکھے گئے تھے،قریب 25 ہزار روپیہ نقد رقم سمیت تین چار  الگ الگ ڈبوں میں بھی کچھ رقم جمع تھی جو چوری ہوگئے ہیں۔ 

اطلاع ملتے ہی مضافاتی پولس تھانہ کے  اہلکار جائے وقوع پر پہنچ کر  جائزہ لیا ہے۔