کمٹہ:12؍جون (ایس اؤ نیوز) دیہی عوام جمعرات کو صبح سویرے نالہ کی سڑک سے سبزی ترکاری لانے نکلے تو راستہ میں سڑی ہوئی ایک عورت کی  نعش دیکھ کر حیرت زدہ رہ گئے۔ عوام کے حیرت کی وجہ یہ تھی کہ نالے میں بہہ کر کنارے لگی ہوئی عورت کی نعش کی گردن ہی نہیں تھی۔ کمٹہ تعلقہ وکنلی میں یہ واقعہ پیش آیاہے۔

وکنلی نامی دیہات کے نالے کےکنارے بغیر گردن والی نعش دیکھتے ہی عوام کے پسینے چھوٹ گئے۔ گھبر ا کر پولس کو اطلاع دی گئی ۔ جائے وقوع پر پہنچی پولس نے شبہ جتایا کہ یہ مقامی عورت کی نعش ہوسکتی ہے۔ پولس کی پوچھ تاچھ کے بعد پتہ چلا کہ نعش ہلکار دیہات کی خیرُ النساء (80) نامی عورت کی ہے۔ اس کے بعد تعلقہ اسپتال میں پوسٹ مارٹم کیاگیا ۔ سی پی آئی پرمیشور گنگا، پی ایس آئی آنند مورتی ، کرائم پی ایس آئی سدھا ہری کنتر ، پروبیشنری پی ایس آئی روی ناگراج نائک ، تمنانایک، سنجیونائک ، ماروتی نائک اور وارڈ کے عوام موجود تھے۔

27دنوں سے لاپتہ : کمٹہ پولس تھانے میں درج ہوئی شکایت کے مطابق ہلکار دیہات کی مکین خیرُ النساء 27دن پہلے اپنے گھر سے رات کو نکلی تو لوٹ کر نہیں آئی تھی۔ پولس کو جب عورت کی نعش کا پتہ چلا تو پولس نے خیرُالنساء کے گھروالوں کو جائے وقوع پر پہنچنے کوکہا۔بعد میں گھروالوں نے   نعش کے کپڑے دیکھنے کے بعد پہچان شناخت کرلی۔