منڈگوڈ کا بس اسٹانڈ تالاب میں تبدیل؛ مسافروں کی جان خطرے میں : عوامی نمائندے، افسران اور ٹھیکدار خاموش
منڈگوڈ :19/جولائی (ایس اؤ نیوز )منڈگوڈ کے عوام کی دیرینہ مانگ ہائی ٹیک بس اسٹانڈ کو ریاستی حکومت نے جب ہری جھنڈی دکھائی اور ٹھیکدار نے بس اسٹائنڈ کے ایک کنارے سے کام بھی شروع کیا تو عوام کی خوشی کا کوئی ٹھکانہ نہیں تھا کہ چلو خواب کی تعبیر بہت جلد پوری ہورہی ہے، مگر ٹھیکدار ایک بڑا گڑھا کھود کر غائب ہوگیا ہے اور اس گڈھے میں اب بارش کا پانی جمع ہوجانے سے یہ کنارہ تالاب کی شکل اختیار کر گیا ہے اور مسافروں اورعوام کے لئے موت کا کنواں ثابت ہورہا ہے۔
موصولہ اطلاعات کے مطابق منڈگوڈ اور یلاپور بس اسٹانڈ کا ٹھیکہ ایک کانٹراکٹر کو ملا ہے۔ منڈگوڈ میں وزیر نے کام کا افتتاح کرتے ہی ٹھیکدار نے کام شروع کرنے کے لئے اتنا بڑا گڑھا کھودا کہ وہ چھوٹے سے تالاب میں منتقل ہو گیا، مگر بارش کے بعد یہ گڈھا مسافروں اور عوام کے لئےموت کی دعوت دے رہاہے۔گڑھے میں جہاں بارش کا پانی ٹھہرا ہے وہیں بڑی مقدار میں کچروں کا ڈھیر بھی جمع ہوگیا ہے۔مسافروں کی طرف سے زیادہ تر یہی شکایت سنی جارہی ہے کہ رات کے اوقات میں کوئی انجان مسافر پیشاب وغیرہ کے لئے ادھر چلاگیا تو لوٹنے کی کوئی امید نہیں ہے، اس کی وجہ سے انسانوں اور جانوروں کی جان بھی جا سکتی ہے۔
انجان مسافر یا عوام بھول کر بھی ادھر گئے تو بچ کرنکلنا محال ہے ، روزانہ سیکڑوں طلبا ، مسافر اور عوام کے لئے خطرے کی گھنٹی بجارہاہے۔ اس سے پہلے بھی منڈگوڈ کا بس اسٹانڈ گندگی کے لئے بدنام تھا ۔ اس پر یہ ٹھیکدار کی غفلتی عوام کی بے چینی میں اضافہ کررہی ہے،کچرا جمع ہونے سے مچھروں کی بھرمار ہوگئی ہے اور بدبو کی وجہ سے مسافروں کے لئے کھڑے رہنا محال ہوگیا ہے جس کو دیکھتے ہوئے بیماریاں پھیلنے کا خدشہ پیدا ہوگیا ہے۔لوگوں نے ہائی ٹیک بس اسٹانڈ کی خواہش کی تھی مگر اب بس اسٹانڈ کے ابتر حالات دیکھ کر کف افسوس مل رہے ہیں۔ یہ سب حالات دیکھتے ہوئے ٹھیکدار کی خاموشی سے ناراض عوام مطالبہ کررہے ہیں کہ متعلقہ محکمہ کے افسران اور عوامی نمائندے اس طرف توجہ دے کر ضروری اقدام کریں اور ٹھیکدارسے بات کرتے ہوئے ہونے والے نقصانات سے بچایا جائے ۔