نئی دہلی،18/مارچ (ایس او نیوز/ایجنسی) جیل میں بند گینگسٹر لارنس بشنوئی کے دوسرے انٹرویو کے منظر عام پر آنے کے بعد بی جے پی نے پنجاب کی بھگونت مان کی قیادت والی عام آدمی پارٹی کی حکومت پر سخت حملہ بولا ہے۔ پارٹی کا الزام ہے کہ بھگونت مان کی حکومت نے پنجاب کی جیلوں کو مجرموں کے غیر اعلانیہ دفاتر اور اسٹوڈیو میں تبدیل کر دیا ہے۔

پنجاب کی عام آدمی حکومت کو ناکام بتاتے ہوئے بی جے پی کے قومی جنرل سکریٹری ترون چُگ نے کہا ہے کہ بھگونت مان کی حکومت کے دوران پنجاب میں امن و امان مکمل طور پر درہم برہم ہو چکا ہے۔ انہوں نے الزام لگایا کہ پنجاب کی جیلوں میں بیٹھ کر مجرم یکے بعد دیگرے انٹرویو دے رہے ہیں، جو حکومت کی ناکامی کی علامت ہے۔

چگ نے کہا کہ پنجاب پولیس کے بیان کے بعد لارنس بشنوئی کا ایک بار پھر انٹرویو حکومت کے جھوٹے دعوؤں کو بے نقاب کر رہا ہے۔ انہوں نے مزید الزام لگایا کہ عام آدمی پارٹی کی حکومت نے جیلوں کو مجرموں کے غیر اعلانیہ دفاتر اور اسٹوڈیو میں تبدیل کر دیا ہے۔

وزیر اعلی بھگونت مان پر دیگر ریاستوں میں سیاسی سیاحت میں مصروف ہونے کا الزام لگاتے ہوئے بی جے پی کے قومی جنرل سکریٹری نے کہا کہ بھگونت مان کو سیاسی سیاحت کو چھوڑ کر اپنی ریاست میں امن و امان پر توجہ دینی چاہئے۔