اُڈپی:21؍نومبر(ایس اؤ نیوز)انسانیت ہی سب سے اعلیٰ ہونے کا سبھی مذاہب نے پیغام دیاہے۔ حضرت محمد ﷺ سمیت سبھی مذہبی پیشواؤں نے پیار و محبت کو اہم قرار دیا ہے۔ اور آج ہمیں ذات پات، طبقات، نسل ، جنس اور مذاہب کی دیواریں توڑکر انسانیت کے نام پر متحد ہونےکی ضرورت ہے۔ ہریڈکا سرکاری ڈگری کالج کی پرنسپال ڈاکٹر نکیتنا نے ان خیالات کااظہار کیا۔
اُڈپی ضلع مسلم وکوٹا اُڈپی تعلقہ شاخ کی جانب سے جمعہ کو اُڈپی امنی رامنا شٹی منی ہال میں’انسانیت کے مسیحا حضرت محمدﷺ کی زندگی اور پیغام‘‘ کے عنوان سے منعقدہ پروگرام میں وہ مہمان خصوصی کی حیثیت سے اپنے خیالات کااظہار کررہی تھیں۔ مسلم وکوٹا کے ضلعی صدر محمد یسین ملپے نے صدارتی خطاب کرتے ہوئے کہاکہ آج میڈیا اسلام کے متعلق سماج میں خوف پیدا کرنے کاکام کررہاہے، جہاد کو دہشت گردی کے غلط معنی میں پیش کررہاہے۔ جب کہ معنی کے لحاظ سے رات اور دن کا فرق ہے، جہاد کا مطلب جدوجہد ، کوشش ہے۔ لفظ جہا د کو میڈیا استعمال کرتےہوئے سماج کو تقسیم کرنے کا کام کررہاہے، لوجہاد، کرونا جہاد، اب یوپی ایس سی جہاد جیسی اصطلاحیں گھڑکر بدنامی کے کام میں مصروف ہے۔ دنیا کے ہرملک میں پھیلے کرونا وائرس جب بھارت میں داخل ہوا تو میڈیا نے اس کو کرونا جہاد اور تبلیغی وائرس میں تبدیل کیا۔
ملپے ابوبکر صدیق جمعہ مسجد کے خطیب مولانا عمران اللہ خان منصوری نے حضرت محمد ﷺ کی سیرت اور پیغام کے متعلق اپنا مقالہ پیش کیا۔ پروگرام میں کلیانپور ملاگریس چرچ کے فادر ولیرئین مینڈونسا ، کرناٹکا ساہتیہ پریشد کے ضلع صدر نیلاور سریندر اڈیگ نے اپنے تاثرات کا اظہار کیا۔ الے اووری شانتی نکیتن انگلش میڈیم اسکول کے ناظم دنیش کنی مہمان خصوصی کےطورپر موجود تھے۔مولانا دانش کی تلاوت قرآن سے پروگرام کا آغاز ہوا۔ وکوٹا اُڈپی تعلقہ کے صدر ٹی ایم ظفر اللہ نے استقبال کیا۔ عبدالعزیز ادیاور نے نظامت کے فرائض انجام دئیے۔ عبدالرزاق نے شکریہ اداکیا۔