مسجد الحرام مکہ کی ہوبہو اذان کرناٹک کے ملباگل کی مسجد سے گونجنے پر بھٹکل کے ایوب خطیب کو عوام الناس نے دی مبارکباد
بھٹکل 16/اپریل (ایس اونیوز) مسجد الحرام مکہ کی ہو بہو اذان جب کرناٹک کے شہر ملباگل کی نو تعمیر مسجد الفتح سے گونجنے لگی تو عوام موذن سےبے حد متاثر ہوئے اور موذن کو پھولوں کی مالا پہناتےہوئے ان کا اکرام کیا۔
ذرائع سےملی اطلاع کےمطابق بینگلور سے قریب سو کلومیٹر دوری پر واقع کولار ضلع کے ملباگل شہر میں 11/اپریل کو مسجد الفتح کا افتتاح عمل میں آیا۔ بتایا گیا ہے کہ افتتاحی اذان کےلئے بھٹکل کے ایوب خطیب کو مدعو کیا گیا تھا، جنہوں نے دوپہر کی اذان دی جو مکہ مکرمہ کی مسجد الحرام کی اذان جیسی ہی تھی۔ بہترین اور کانوں میں رس گھولتی سریلی آواز سے اذان دینے پر مسجد کمیٹی کی جانب سے ایوب خطیب کو پھولوں کی مالا پہنائی گئی اور ان کی تہنیت کی گئی۔
یاد رہے کہ ایوب خطیب وقفے وقفے سے بھٹکل کی نور جمعہ مسجد میں اذان دیتے رہتے ہیں، اسی طرح بھٹکل کی دوسری مساجد میں بھی ان کی اذان گونجتی رہی ہے جو ہو بہو مسجد الحرام سے گونجنے والی اذان جیسی ہوتی ہے۔ حال ہی میں انہوں نے اُڈپی کی ایک مسجد میں بھی اذان دی تھی جس کا سوشیل میڈیا پر خوب چرچا ہوا تھا۔