کاروار 11؍اپریل (ایس او نیوز) ضلع شمالی کینرا میں انتخابی ضابطہ اخلاق پر سختی کے ساتھ عمل درآمد کرنے میں تعاون حاصل کرنے کے لئے ضلع ڈپٹی کمشنر ڈاکٹر ہریش کمار نے پڑوسی ریاست گوا کے اعلیٰ افسران کے ساتھ باہمی میٹنگ کا انعقاد کیااورمختلف اہم نکات پر گفتگو کی گئی۔

میٹنگ میں اہم ترین نکتہ گواسے اسمگل ہونے والے شراب کا تھا۔ ضابطہ اخلاق جاری ہونے کے بعد محکمہ آبکاری اور کوسٹ گارڈ کے ذریعے کی گئی غیر قانونی شراب کی ضبطی اور اسمگلنگ روکنے کی کوششوں پر تفصیل سے بات چیت ہوئی۔ڈی سی ڈاکٹر ہریش کمار نے ریاست گوا کے افسران سے گزارش کی کہ ضلع شمالی کینرا کے بعض علاقے چونکہ گوا کی سرحد سے بالکل ملے ہوئے ہیں اس لئے گوا چیک پوسٹ پر ہی انتخابی ضابطہ اخلاق کی خلاف ورزیاں روکنے کے لئے اقدامات کیے جائیں۔

اس میٹنگ میں جنوبی گوا کے ڈپٹی کمشنر ایگنیلو فرنانڈیز نے اپنی بات رکھتے ہوئے کہا کہ انتخابی ضابطے کی خلاف ورزیاں روکنے کے لئے اس وقت گوا میں خصوصی اسکواڈ تشکیل دئے گئے ہیں۔غیر قانونی شراب کی فروخت اوراسمگلنگ کی روک تھام کے لئے بھی اقدامات کیے گئے ہیں۔خصوصی طور پر کرناٹکا کے سرحدی علاقوں میں تفتیشی ٹیمیں سرگرم ہیں۔کرناٹکا پولیس اور محکمہ آبکاری کے افسران کوان کے ساتھ تعاون کرنا چاہیے۔ضلع ایس پی ونائیک پاٹل نے کہا کہ گوا کے راستے ضلع میں منشیات کی اسمگلنگ ایک بڑا مسئلہ ہے۔اس لئے گوا میں اس پر کڑی نگاہ رکھنا اور پابندی لگانا بہت ضروری ہے۔

اس میٹنگ میں ضلع پنچایت چیف ایکزیکٹیو آفیسر ایم روشن، ضلع شمالی کینرا محکمہ آبکاری کے اسسٹنٹ کمشنر ایل منجو ناتھ، جنوبی گوا کے محکمہ آبکاری کے سپرنٹنڈنٹ پئیڈیت فرنانڈیز، جنوبی گوا کے ٹرانسپورٹ ڈپٹی ڈائریکٹر پرکاش آجھاویڈو، کانکون کے تحصیلدار جان فرنانڈیز، کوسٹ گارڈ کمانڈنٹ اے ایس نندا، ضلع شمالی کینرا سٹیٹ ٹرانسپورٹ کے آفیسر وشال ، انکم ٹیکس انسپکٹر دنیش کمار، محکمہ آبکاری کے انسپکٹرپرمود جووینکر وغیرہ موجود تھے۔