گورکھپور: 21 /اپریل(ایس اونیوز /آئی این ایس انڈیا)vگورکھپور سے بی جے پی ممبر اسمبلی رادھا موہن داس اگروال نے مالیگاؤں بم دھماکوں کی ملزم اور بھوپال لوک سبھا سیٹ سے بی جے پی امیدوار پرگیہ ٹھاکر کے شہید ہیمنت کرکرے کے متعلق دیئے گئے بیان کو غداری قرار دیا ہے۔ اگروال نے جمعہ کو ایک ٹویٹ کر کہا کہ ہیمنت کرکرے دہشت گردوں سے مقابلہ کرتے ہوئے شہید ہو گئے اور ان کی شہادت کی توہین کرنا نہ صرف شرمناک بلکہ غداری بھی ہے۔ اس بارے میں ہفتہ کو پوچھے جانے پر اگروال نے کہا کہ ہاں میں نے یہ ٹویٹ کیا ہے اور میں اپنے بیان پر قائم ہوں۔ ہیمنت کرکرے بھارت کے عظیم شہید اور بہترین پولیس افسر تھے۔ اس سوال پر کہ پرگیہ کو بھوپال لوک سبھا سیٹ سے بی جے پی نے ہی امیدوار بنایا ہے، سنگھ نے کہا کہ پارٹی پہلے ہی پرگیہ کے بیان سے خود کو الگ کر چکی ہے۔ پرگیہ کا بیان پارٹی کا بیان نہیں ہے۔ اسی وجہ سے انہوں نے معافی بھی مانگی ہے۔ غور طلب ہے کہ پرگیہ ٹھاکر نے ممبئی حملوں کے دوران شہید ہوئے پولیس افسر ہیمنت کرکرے کے خلاف متنازعہ بیان دیتے ہوئے کہا تھا کہ مالیگاؤں بم دھماکے کے معاملے میں گرفتاری کے بعد کرکرے نے انہیں اذیتیں دی تھیں اور اس کی ’شراپ‘ کی ہی وجہ سے دہشت گردوں نے انہیں مار ڈالا۔ اس بیان کی شدید مخالفت کے بعد پرگیہ نے معافی مانگ لی تھی۔