بنگلورو، 16؍جولائی(ایس او  نیوز)اگلے تعلیمی سال سے ریاستی حکومت ہائی اسکول سطح پر ہی تکنیکی تعلیم کے متعلق بنیادی معلومات فراہم کر نے کے لئے ضروری قدم اٹھانے کا منصوبہ رکھتی ہے۔ یہ اعلان جمعرات کے روز وزیر اعلیٰ بسواراج بومئی نے کیا۔

ودھان سودھا کے بینکویٹ ہال میں عالمی یوم ہنرمندی تقریبات میں حصہ لیتے ہوئے انہوں نے کہا کہ 1960کے دہے میں طلباء کو ہائی اسکول کی سطح پر ہی تکنیکی تعلیم سے آراستہ کردیا جاتاتھا بعد میں مرحلہ وار اس سلسلہ کو ختم کردیا گیا۔

انہوں نے کہا کہ تعلیم کے ابتدائی مرحلہ میں ہی اگر بچوں کو اپنی گزربسر کے بارے میں بنیادی تربیت دے دی جائے تو اس سے ان کو مستقبل میں کافی فائدہ ہو گا۔ اسی مقصد کے تحت حکومت نے پرانے نظا م کو جدید تقاضوں کی بنیاد پر بحال کرنے کا فیصلہ کیا ہے۔انہوں نے کہا کہ 9,8اور10ویں جماعت کے طلباء کو اگلے سال سے بنیادی تکنیکی تعلیم سے آراستہ کیا جائے گا۔

انہوں نے کہا کہ ہنر مندی کے شعبے میں کرناٹک کو ملک کی تمام ریاستوں سے آگے ہو نا چاہئے۔انہوں نے اعلان کیا کہ ریاست بھر میں آئی ٹی آئی مراکز کی جدید کاری کی جائے گی اور ان میں داخلوں کی تعداد کو بھی بڑھایا جائے گا۔ریاست کے چھ اہم انجینئرنگ کالجوں کو آئی آئی ٹی کے درجے تک ترقی دی جائے گی۔

مسٹر بومئی نے کہا کہ استری شکتی گروپوں کے ذریعے حکومت 5لاکھ خواتین کو ہنر مندی کی تربیت سے آراستہ کرنے کی کوشش میں ہے۔ اس موقع پر ریاستی وزیر برائے اعلیٰ تعلیم ڈاکٹر سی این اشوتھ نارائین نے کہا کہ نوجوانوں کو ہنرمندی کے شعبہ میں ایسی تربیت سے آراستہ کرنے کا منصوبہ ہے جو دور حاضر کے تقاضوں کے عین مطابق ہو۔ ضلع اور ریاستی سطح پر حکومت نے اس کے لئے چند نجی اداروں سے اشتراک کیا ہے۔انفوسس ادارے کی جانب سے 27لاکھ افراد کو تربیت دی گئی ہے، ان میں سے 17لاکھ کا تعلق کرناٹک سے ہے۔