بھٹکل 17 ستمبر (ایس او نیوز) غیر قانونی طور پر ساگوانی لکڑیاں ایک جگہ سے دوسری جگہ لے جانے کے دوران محکمہ جنگلات کے آفسران نے دھاوا بولتے ہوئے سواری کو ساگوانی لکڑیوں سمیت ضبط کرلیا، مگر اس دوران ملزم فرار ہونے میں کامیاب ہوگئے۔
ذرائع نے بتایا کہ بدھ اور جمعرات کی درمیانی شب قریب ایک بجے بھٹکل تعلقہ کے اُترکوپّا روڈ کے قریب کمٹیکیری کائیکنی میں محکمہ جنگلات کے ہوناور ڈیویژن کے بھٹکل سیکٹر کے آفسران گشت کررہے تھے جس کے دوران انہوں نے دیکھا کہ کچھ لوگ ساگوانی لکڑیوں کو تراش کر سواری پر لاد کر لے جارہے ہیں، جیسے ہی محکمہ جنگلات کے آفسران نے ان کی سواری کو روکنے کی کوشش کی، سواری پر موجود لوگ سواری کو وہیں چھوڑ کر فرار ہوگئے۔ آفسران نے بتایا کہ قریب 60 ہزار مالیت کی لکڑیوں کو ضبط کیا گیا ہے، ساتھ ساتھ ان کی سواری کو بھی محکمہ جنگلات نے اپنی تحویل میں لے لیا ہے۔
سنئیر آفسران ڈپٹی فوریسٹ کنزرویٹر گنپتی نائیک اور ان کے اسسٹنٹ سدرشن کی زیر نگرانی محکمہ جنگلات کے آفسران سویتا آر دیواڑیگا، جگدیش نائیک اور شری کانت ایس پوار اور شرالی کے اہلکار وغیرہ کی موجودگی میں یہ کاروائی انجام دی گئی۔ فرار ملزموں کی تلاش جاری ہے۔