مرکزی وزیر سے سوال کرنے والابیدر کا ٹیچر معطل
بیدر،24؍جون (ایس او نیوز؍ایجنسی) کرناٹک کے مرکزی وزیرمملکت برائے کیمیکلس و فرٹیلائزرس بھگونت کھوباسے فون پر سوال کرنے پر ایک اسکول ٹیچر کو معطل کردیا گیا ہے۔ ذرائع سے ملی اطلاع کے مطابق ٹیچر کی جانب سے وزیر بھگونت کھوبا سے ہوئی فون کی بات چیت کی آڈیو کلپ سوشیل میڈیا پر بھی وائرل ہوگئی ہے۔ پتہ چلا ہے کہ ٹیچر جس کا نام کشال پاٹل ہے، ضلع بیدر کے اوراد کے ایک اسکول میں پڑھاتے تھے۔
ذرائع کے مطابق محکمہ تعلیم نے ٹیچر کشال پاٹل کو اُن کے عہدے سے معطل کردیا آڈیو کلپ کے مطابق وزیر کھوبا جنہیں کشال پاٹل سے فون کال موصول ہواتھا‘فرٹیلائزرس کی عدم دستیابی کے بارے میں سوال پر برہم ہوگئے۔
ویڈیو میں وزیر کو یہ کہتے ہوئے سنا گیا کہ وہ‘ فرٹیلائزرس کی عدم دستیابی پر کچھ نہیں کرسکتے۔فرٹیلائزرس کی سپلائی کیلئے ہزاروں ورکرس موجود ہیں اور کسانوں سے کہیں کہ وہ ان سے رجوع ہوں۔
انہوں نے مزید کہا کہ ریاستوں کو فرٹیلائزرس بھیجنا ان کی ذمہ داری ہے جو انہوں نے پوری کی۔انہوں نے کسانوں سے کہا کہ وہ مقامی ایم ایل اے اور ملازمین سے رجوع ہوں۔وزیر نے کسانوں سے یہ بھی کہا کہ انہیں دوسرے اہم کام بھی انجام دینے ہیں۔
جب ٹیچر نے وزیر کو چیالنج کیا کہ وہ حلقہ سے اگلی بار منتخب نہیں ہوں گے تو وزیر نے کہا کہ وہ جانتے ہیں کہ انتخابات کس طرح جیتا جاتا ہے۔ وزیر نے فون کرنے والے سے یہ بھی کہا کہ وہ جو بھی کرسکتے ہیں‘ کریں۔ میں حکومت ہند کے تحت ایک وزیر ہوں اور ریاستوں کی فکر کرتا ہوں۔آپ کو اپنے ایم ایل اے اور آفیسرس کے پاس جانا چاہئے۔
یہ بات چیت شوسیل میڈیا پر گشت ہوگئی اور کرناٹک میں واٹس ایپ گروپس میں وزیر کے رد عمل پر ایک بحث چھڑ گئی۔مرکزی وزیر کھوبا نے واقعہ کے بارے میں اپنی وضاحت میں کہا کہ جس شخص نے انہیں فون کیا وہ ایک کسان نہیں بلکہ ایک ٹیچر ہے۔
میڈیا میں اطلاع دی گئی تھی کہ وہ ایک کسان ہے۔ انہوں نے مزید کہا کہ وہ ایک سرکاری اسکول کے ٹیچر ہیں اورانہوں نے تین تا چار مرتبہ مجھ سے ربط پیدا کرنے کی کوشش کی۔مرکزی وزیر نے کہا کہ انہوں نے یہ سوچتے ہوئے فون کا جواب دیا کہ انہیں کوئی اہم مسئلہ ہوسکتا ہے۔
اس شخص نے فرٹیلائزرس کے مطالبہ کے بہانہ میرے خلاف نازیبا الفاظ استعمال کئے۔ انہوں نے دعویٰ کیا کہ ویڈیو کو ایڈٹ کیا گیا ہے اور اس کا ایک حصہ پارٹی اور انہیں نقصان پہنچانے کیلئے دانستہ طورپر گشت کیا گیا۔