ہاسن میں خطرناک سڑک حادثہ؛ چار ہلاک، 14 زخمی
ہاسن 21 فروری (ایس او نیوز) ٹاٹا سومو اور کوالیس کے درمیان ہوئی بھیانک ٹکر میں چار لوگوں کی موقع پر ہی موت واقع ہوگئی جبکہ 14 دیگر شدید زخمی ہوئے جنہیں قریبی اسپتالوں میں داخل کیا گیا ہے۔
حادثہ سنیچر اور اتوار کی درمیانی شب کو بنگلور۔مینگلور نیشنل ہائی وے پر اُس وقت پیش آیا۔ ٹاٹا سومو کو پیچھے سے کوالیس گاڑی نے تیز رفتاری کے ساتھ ٹکر مار دی۔ ٹکر لگتے ہی سومو اُلٹ گئی۔
ذرائع سے ملی اطلاع کے مطابق ٹاٹا سومو پر سوار دس افراد مولباگل سے دھرمستھلا جارہے تھے، جس میں سے چار لوگوں کی موقع پر ہی موت واقع ہوگئی، جبکہ ایک کی حالت نازک بتائی گئی ہے۔ مرنے والوں کی شناخت کے جی ایف کے رہنےوالے دیپک کمار، چندرشیکھر، نوین کمار اور سنیل کمار کی حیثیت سے کی گئی ہے۔ کوالیس گاڑی پر آٹھ لوگ سوار تھے جو کے جی ایف سے اُڈپی ایک شادی کی تقریب میں شریک ہونے جارہے تھے۔ زخمی ہونے والوں میں چار خواتین اور تین بچے شامل ہیں۔
بتایا گیا ہے کہ راستے پر ہمپ آنے کی وجہ سے ٹاٹا سومو نے اپنی رفتار کم کردی تھی، جس کے دوران تیز رفتار کوالیس نے پیچھے سے سومو کو ٹکرماردی۔
