پانی کی مناسب سربراہی کیلئے ٹاسک فورس کی تشکیل
بنگلورو،24اپریل (ایس او نیوز؍یواین آئی ) کرنا ٹک میں لوک سبھا انتخابات کے بعد جس میں بنگلورو نارتھ کی نشست پر مقابلہ کرنے والے کرناٹک کے وزیردیہی ترقی و پنچایت راج کرشنابائیرے گوڑا نے عہدیداروں کو ہدایت دی کہ وہ ریاست کے خشک سالی سے متاثرہ تعلقہ جات میں پینے کے پانی کے مسئلہ کے حل کیلئے فوری اقدامات کریں۔ وزیر موصوف جنہوں نے ریاست میں خشک سالی کی صورتحال کا جائزہ لیا' ہدایت دی کہ خشک سالی سے متاثرہ تعلقہ جات میں تشکیل دیئے گئے ٹاسک فورسس کیلئے فنڈس جاری کئے جائیں۔ یہ کہتے ہوئے کہ ریاست کے176سے زائد تعلقہ جات خشک سالی سے متاثر قرار دیئے گئے ہیں' وزیرموصوف نے عہدیداروں کو انتباہ دیا کہ وہ پینے کے پانی کی کمی سے متعلق کوئی بھی شکایات ریاست میں کہیں سے بھی سننا نہیں چاہتے ۔انہوں نے کہا کہ چوں کہ الیکشن کمیشن نے ہنگامی ضروریات کی تکمیل کیلئے مختصر مدتی ٹنڈرس کی طلبی کی رکاوٹ دورکردی ہے۔ متاثرہ مواضعات میں پینے کے پانی کی سپلائی سے متعلق کاموں کے آغاز میں کوئی تاخیرنہیں ہونی چاہئے ۔وزیرموصوف نے عہدیداروں کو ہدایت دی کہ ہر ضلع میں ڈپٹی کمشنرس کے پاس دستیاب این ڈی آر ایف کے فنڈ س سے استفادہ کیا جائے ۔ وزیر موصوف نے عہدیداروں کو انتباہ دیاکہ فرائض میں کوتاہی پر سخت کارروائی کی جائے گی۔