ہبلی میں پلاسٹک پر پابندی سے متعلقہ پروگرام میں مرکزی وزیر پرہلاد جوشی ، ڈپٹی کمشنر اور بلدی کمشنرپر برس پڑے
ہبلی3/اکتوبر(ایس او نیوز) ملک بھر میں گاندھی جینتی کے موقع پر پلاسٹک سے چھٹکارا پانے کی جو مہم شروع کی گئی ہے اس سے متعلقہ ایک پروگرام کے دوران ہبلی میں مرکزی وزیر پرہلاد جوشی نے ضلع ڈپٹی کمشنر اوربلدیہ کمشنرکو آڑے ہاتھوں لیا اور اسٹیج پر عوام کے سامنے ہی بری طرح برستے ہوئے اپنی سخت ناراضگی ظاہر کی۔
ذرائع سے ملی اطلاع کے مطابق ہبلی کے لیمنگٹن اسکول میں منعقدہ اس پروگرام میں اسٹیج پر ہی پرہلاد جوشی مذکور ہ افسران کے ساتھ اس بات پر الجھ پڑے کہ پروگرام منعقد کرنے سے پہلے اس کی ترتیب وتشکیل کے لئے انہوں نے میٹنگ طلب کرنے کو کہا تھا، مگر اس پر عمل نہ کرتے ہوئے اورانہیں نظر انداز کرتے ہوئے یہ پروگرام کیوں منعقد کیا گیا ہے۔
پرہلاد جوشی کا کہنا تھا کہ پلاسٹک سے چھٹکارے والا بھارت، وزیراعظم نریندرامودی کا خواب ہے۔ اسے پورا کرنے کے لئے پیشگی میٹنگ میں مجھے شریک کیا جانا چاہیے تھا۔ مجھ سے مشورہ کیے گئے بغیر اس پروگرام کے تعلق سے بیداری لانے کی جو میٹنگ اندرا گلاس ہاؤس میں منعقد کی گئی تھی، اس میں بلدیہ کمشنر سریش ایٹنال نے مجھے شرکت کے لئے کہا تومیں اس میں حاضر نہیں ہوا۔
عین پروگرام کے دوران اسٹیج پر ہی ریاستی وزیر جگدیشن شیٹر کی موجودگی میں پرہلاد جوشی کی طرف سے اس طرح آڑے ہاتھوں لیے جانے کی وڈیو بھی سوشیل میڈیا پر وائرل ہوگئی ہے۔ جس میں دیکھا گیا ہے کہ ڈپٹی کمشنر دیپا چولن اور بلدیہ کمشنر سریش ایٹنال کے چہرے پر ہوائیاں اُڑ رہی ہیں۔