بنگلورو، 21؍جولائی (ایس او نیوز؍ یو این آئی ) جنتادل سیکولر کے سینئر لیڈر ایچ ڈی کمار سوامی نے کرناٹک حکومت کو مشورہ دیا کہ وہ خانگی میڈیکل کالجس کو لائسنس منسوخ کرنے کی دھمکی دینے بجائے  انہیں اعتماد میں لے کر کووڈ۔19 مریضوں کے علاج میں ان کی خدمات حاصل کرے۔

انہوں نے کہا کورونا وائرس سے نمٹنے کے لیے پوری توجہ سے اقدامات کیے جانے چاہیے۔ کمار سوامی نے ٹوئٹ کیا کہ کسی بھی اسپتال کی جانب سے علاج سے انکار کرنا غلط ہے۔ اس وجہ سے حکومت کی جانب سے ان کو لائسنس منسوخ کرنے کی دھمکی دینا بھی صحیح نہیں ہے۔ ان ہنگامی حالات میں اس سے کوئی فائدہ نہیں ہونے والا۔ یادرکھیے کہ لائسنس منسوخ کرنے کا حق ایم سی اے کے پاس ہے نہ حکومت کے پاس۔ ‘‘ ا نہوں نے کہا کہ اس دور میں میڈیکل کالجوں پر غصہ نکالنے کے بجائے انہیں اعتماد  میں لے کر ان کی خدمات حاصل کرنے پر توجہ دینی چاہیے۔ ان کی ضرورتوں کو دیکھیے ۔ میں کورونا وائرس کے خلاف جی جان لگانے کی اپیل کرتا  ہوں۔‘‘

چیف منسٹر بی ایس یڈیورپا نے کووڈ۔19 کے انتظام کو لے ہفتہ کو خانگی میڈیکل کالج اسپتالوں کے ساتھ اجلاس کیا تھا اور انہیں وعدے کے مطابق 50 فیصد بستر فراہم کرنے کی ہدایت دی تھی۔