بھٹکل انجمن انجینئرنگ کالج کے فارغین کی دبئی میں نشست؛قائد قوم نے کہا؛ فارغین کا ساتھ ملا تو انجمن کی کامیابی یقینی
دبئی 21 فروری (ایس او نیوز؍جیلانی محتشم)گذشتہ دنوں دبئی میں قائد قوم ڈاکٹر ایس ایم سید خلیل الرحمن صاحب کی رہائش گاہ پر بھٹکل انجمن انجنیرنگ کالج کے فارغین کی ایک خصوصی نشست منعقد ہوئی جس میں انجمن انجنیرنگ کالج کے اولین بیچBatch کے فارغین نے بھی شرکت کی ۔
جناب محمد غوث خلیفہ کی تلاوت سے نشست کاآغاز ہوا ۔ جناب محی الدین رکن الدین نے استقبالیہ کلمات پیش کئے ۔ اس کے بعد ڈاکٹرایس ایم سید خلیل صاحب نے کہا کہ انجمن انجنیئرنگ کالج کی ترقی انجمن مینجمنٹ کے ساتھ ساتھ ان کے فارغین پر بھی منحصر ہے ‘ کالج کے فارغین اپنے تعلیمی ادارہ کا ساتھ دیں گے تو ان اداروں کی کامیابی یقینی ہے۔
موقع پر موجود انجمن حامئی مسلمین بھٹکل کے صدر جناب عبدالرحیم جوکاکو صاحب نے تمام فارغین کو بھٹکل آکر اپنے کالج میں حاضری دینے کی دعوت دی اور سال میں کم ازکم ایک وقت متعین کرکے کالج کا دورہ کرکے کالج کے طالب علموں کے ساتھ تکنیکی و دیگر معلومات پر گفتگو کرنے کی بھی گذارش کی ۔ انجمن صدر نے بتایا کہ انجمن کی صد سالہ تقریبات کے موقع پر ڈسمبر کے آخری ہفتہ میں یوم ابناء انجمن Anjuman Alumni Dayمنعقد ہوگاانہوں نے تمام فارغین انجمن سے درخواست کی کہ وہ اس پروگرام میں شریک ہوں۔ کالج کے اولین فارغین میں سے جناب محمد اشفاق سعدا اور جناب رئیس حارث سمیت دوسرے فارغین نے بھی اپنے تاثرات پیش کئے اور انجمن انجیئرنگ کالج کے لئے تعاون دینے کا یقین دلایا۔
نشست میں انجمن انجینئرنگ کالج سے فارغ سعید کولا اور رافع اسرمتا نے اپنا انوکھا بزنس پروجکٹ Micro Mobility پر روشنی ڈالی اور فارغین سے اس کو عملی جامہ پہنانے میں تعاون فراہم کرنے کی درخواست کی ۔