بھٹکل :18/جولائی (ایس اؤ نیوز)قومی سماجی ادارہ مجلس اصلاح و تنظیم بھٹکل کے حمایت یافتہ  سید آدم پنمبور جالی پٹن پنچایت کے   نئے صدر  کی حیثیت سے  متفقہ طورپر  منتخب ہوگئے ہیں۔

بدھ کو جالی پٹن پنچایت کی  انتخابی  کارروائی کے دوران صبح دس سے بارہ بجے تک صدارتی عہدہ کے لئے پرچہ داخل کرنے کی مہلت دی گئی تھی، جس میں صرف  سید آدم پنمبور نے ہی اپنا پرچہ نامزدگی داخل کیا۔ ضروری کاغذی کاروائیوں کے بعد دوپہر تین بجے بھٹکل  تحصیلدار وی این باڈکر نے الیکشن کمشنر کی حیثیت سے فرائض انجام دیتے ہوئے ان کے صدر منتخب ہونے کا اعلان کیا۔

کل 20ممبران پر مشتمل جالی پٹن پنچایت میں کانگریس کے 5، بی جے پی کے 3اور تنظیم کے حمایت یافتہ 12آزاد امیدواروں نے جیت درج کی تھی  ۔ آج انتخابی کاروائی کے عمل کے دوران  میٹنگ میں پنچایت ممبر گنپیا گونڈا غیر حاضر رہے۔

خیال رہے کہ گذشتہ سال جالی پنچایت کے انتخابات میں عبدالرحیم نےاُس وقت کے کانگریسی رکن اسمبلی منکال وئیدیا کا تعائون لیتے ہوئے پنچایت کی صدارت پر قابض ہوئے تھے، مگر حال ہی میں ہوئے اسمبلی انتخابات میں  تنظیم نے جب کانگریس کے اُمیدوار منکال وئیدیا کی  حمایت کی تو انتخابی نتائج کے چند روز بعد ہی  یعنی 29 مئی کو عبدالرحیم نے اپنے عہدہ صدارت سے استعفیٰ دیا تھا۔ 

اُن کے استعفیٰ کے بعدآج بدھ کو انتخابات منعقد ہوئے تھے جس میں  سید آدم نے جیت درج کی۔ خیال رہے کہ  نئے صدر کی مدت 29مارچ 2019کو ختم ہوگی۔

صدر منتخب ہونے کے بعد اپنے تاثرات پیش کرتے ہوئے سید آدم نے اللہ کا شکر اداکیا اور مجلس اصلاح وتنظیم سمیت تمام ممبران، وارڈس کے ووٹرس ، علاقہ کے اسپورٹس سنٹر وغیرہ کا بھی شکریہ اداکیا۔ انہوں نے  کہاکہ جتنا بھی وقت ملا ہے اس کا صحیح استعمال کرتے ہوئے علاقہ کی بنیادی سہولیات کو فراہم کرنے ایماندارانہ کوشش کریں گے۔