تیراکی میں یونیورسٹی بلیو کا خطاب جیتنے والے بھٹکل انجمن کالج کے محمد اشفاق اب کریں گے آل انڈیا ٹورنامنٹ میں کرناٹکا یونیورسٹی دھارواڑ کی نمائندگی
بھٹکل 18/اکتوبر (ایس او نیوز) انجمن آرٹس سائنس کامرس کالج اور پی جی سینٹر بھٹکل کے ایک طالب العلم محمد اشفاق ابن محمد اسلم تیراکی میں بہترین مظاہرہ پیش کرتے ہوئے کرناٹکا یونیورسٹی بلیو کا خطاب حاصل کرنے میں کامیاب ہوگئے ہیں ۔کالج کے فزیکل ڈائرکٹر نے بتایا کہ تیراکی میں یونیورسٹی بلیو کا خطاب حاصل کرنے والا انجمن کا یہ پہلا طالب العلم ہے۔
ستمبر 23 سے 25 کے درمیان دھارواڑ میں منعقدہ تیراکی مقابلے میں بھٹکل انجمن کالج کو چمپئن شپ حاصل ہوئی تھی جس میں کالج کے بی کام تھرڈ سمسٹر کے طالب العلم محمد اشفاق نے بہترین تیراکی کا مظاہرہ پیش کیا تھا ۔اب بھٹکل انجمن کالج کو موصولہ دھارواڑ یونیورسٹی کے خط میں واضح کیا گیا ہے کہ محمد اشفاق اب کرناٹکا یونیورسٹی دھارواڑ کی نمائندگی کرتے ہوئے قومی سطح پر آل انڈیا انٹر یونیورسٹی ٹورنامنٹ میں حصہ لیں گے۔ یہ مقابلہ پنچاب میں یکم نومبر سے 4/نومبر تک ہوگا۔
محمد اشفاق کی اس اہم کامیابی پر انجمن حامئی مسلمین بھٹکل کے عہدیداران، انتظامیہ اراکین اور کالج کے پرنسپال سمیت دیگر عملہ نے مبارکباد پیش کی ہے ۔