منگلورو : 'فریڈم کمیونٹی ہال' پر این آئی اے نے مارا چھاپہ - پی ایف آئی کارکنان پر لگایا دہشت گردی کی تربیت دینے کا الزام - ایک گرفتار دوسرا فرار
منگلورو،30؍ستمبر (ایس او نیوز) پی ایف آئی کارکنان کو دہشت گردی کی تربیت دینے کا الزام لگاتے ہوئے این آئی اے نے بنٹوال تعلقہ کے میتور میں ایک ٹرسٹ کے ذریعے چلائے جا رہے 'فریڈم کمیونٹی ہال' پر چھاپہ مارا اور ایک ٹرسٹی کو گرفتار کرلیا جبکہ مبینہ طور پر دوسرا ٹرسٹی فرار ہوگیا۔
اطلاع کے مطابق گرفتار کیے گئے ملزم کا نام ایوب اگناڈی ہے جبکہ مفرور ملزم کا نام مسعود اگناڈی بتایا گیا ہے ۔ سرکاری ایجنسیوں کی طرف سے شبہ ظاہر کیا جا رہا ہے کہ بنٹوال ، پتور اور سولیا میں پی ایف آئی کی جڑیں بہت گہری ہیں اور ان کے کارکنان مشکوک سرگرمیوں میں ملوث ہیں۔
آج جس ہال پر چھاپہ مارا گیا وہ ہال 2007 میں ایک ٹرسٹ کے نام پر تعمیر کیا گیا تھا ۔ سرکاری ایجنسیوں کا کہنا ہے کہ اس فریڈم کمیونٹی ہال میں پی ایف آئی کے کارکنان کو تربیت دی جاتی ہے ۔ جو لوگ بنگلورو کے ڈی جے ہلّی اور کے جے ہلّی فساد میں ملوث تھے انہیں بھی اسی ہال میں تربیت دی گئی تھی ۔ انہی شکوک اور الزامات کے تحت این آئی اے نے چھاپہ ماری کی اور فوری طور پر ہال کو ضبط کرنے کی ہدایت دی۔