دبئی،17؍جنوری (ایس او نیوز؍ایجنسی) متحدہ عرب امارات (یو اے ای) میں ابوظبی بین الاقوامی ائیرپورٹ پر تین تیل ٹینکر دھماکہ سے تباہ ہو گئے۔ اندیشہ ظاہر کیا جا رہا ہے کہ یہ تیل ٹینکر ایک حملے کا شکار ہوئے ہیں۔ یو اے ای افسران کا کہنا ہے کہ حملے ڈرون کی مدد سے کیے گئے ہیں جس میں 3 لوگوں کی موت واقع ہو گئی۔ میڈیا رپورٹس کے مطابق ہلاک شدگان میں دو ہندوستانی بھی شامل ہیں۔

اس واقعہ کی جانچ شروع ہونے سے پہلے ہی یمن کے ایران-اتحاد حوثی تحریک نے حملے کے ذمہ داری لے لی ہے۔ اس تنظیم نے بیان جاری کر یو اے ای پر حملے شروع کرنے کی بات کہی ہے۔

ابوظبی پولیس کا کہنا ہے کہ صنعتی علاقہ مصفی میں تین ایندھن ٹینکر ٹرکوں میں دھماکہ ہوا۔ یہاں تیل فرم اے ڈی این او سی کا ایندھن اسٹور رہتا ہے۔ بتایا جا رہا ہے کہ ابوظبی بین الاقوامی ہوئی اڈے پر ایک کنسٹرکشن سائٹ پر آگ لگ گئی ہے۔ اس دھماکہ میں 6 افراد زخمی بھی ہوئے ہیں۔ زخمیوں کی شناخت ابھی تک ظاہر نہیں کی گئی ہے۔

پولیس نے خبر رساں ایجنسی ڈبلیو اے ایم کو دیے گئے ایک بیان میں کہا کہ ’’شروعاتی جانچ میں ایک چھوٹے طیارہ کا کچھ حصہ ملا ہے۔ ممکن ہے کہ یہ ڈرون کے حصے ہوں۔ ہو سکتا ہے کہ دونوں مقامات پر ڈرون سے حملہ کیا گیا ہو اور اس سے آگ لگ گئی ہو۔‘‘

اس درمیان یمن کی حوثی تحریک کے ترجمان نے کہا ہے کہ گروپ یو اے ای میں ایک ملٹری آپریشن شروع کرنے جا رہا ہے اور آنے والے کچھ ہی گھنٹوں میں اس کی جانکاری دے دی جائے گی۔ واضح رہے کہ حوثیوں نے سعودی عرب کے ائیرپورٹ کو نشانہ بنا کر کئی بار میزائل اور ڈرون سے حملے کیے ہیں۔ گزشتہ سال بھی حملہ کیا گیا تھا۔ جنوبی سعودی عرب کے ایک ائیرپورٹ پر ڈرون سے حملہ ہوا تھا جس کے سبب ایک مسافر طیارہ میں آگ لگ گئی تھی۔ اگست 2021 میں بھی حوثیوں نے سعودی عرب کے ایک ائیرپورٹ کو نشانہ بنایا تھا۔