نئی دہلی،20/جون (ایس او نیوز/ آئی این ایس انڈیا) سپریم کورٹ نے گجرات میں راجیہ سبھا کی دو سیٹوں پر الگ الگ انتخابات کرانے کے الیکشن کمیشن کے فیصلے کو چیلنج دینے والی ریاستی کانگریس کی درخواست پر بدھ کو سماعت کرتے ہوئے کمیشن سے 24 جون تک جواب دینے کو کہا ہے۔جسٹس دیپک گپتا اور جسٹس سوریہ کانت کی بنچ نے کیس کی سماعت کے لئے 25 جون کی تاریخ مقرر کرتے ہوئے کہا کہ اس پر سماعت کی ضروری ہے۔بنچ نے کہاہے کہ یہ ایسا مسئلہ نہیں ہے جسے انتخابی پٹیشن کے ذریعے اٹھایا جا سکے، لہٰذا اس پر سماعت ضروری ہے۔ گجرات کانگریس کی جانب سے پیش ہوئے سینئر وکیل وویک تنکھا نے کہا کہ دہلی ہائی کورٹ کے کچھ فیصلے ہیں جو ان کے حق میں ہیں۔اس پر بنچ نے کہاکہ ہم ابھی کچھ نہیں کہہ رہے ہیں۔ہمیں یہ فیصلہ کرنا ہوگا کہ یہ جگہ خالی ہے یا پھر آئینی۔اس معاملے پر سماعت ضروری ہے۔غور طلب ہے کہ بی جے پی صدر امت شاہ اور پارٹی کی سینئر لیڈر اسمرتی ایرانی کے بالترتیب گاندھی نگر اور امیٹھی سے لوک سبھا پہنچنے کے بعد گجرات سے راجیہ سبھا کی دو سیٹیں خالی ہو گئی ہیں۔الیکشن کمیشن کی جانب سے 15 جون کو جاری پریس ریلیز کے مطابق دونوں سیٹوں کے لئے انتخابات پانچ جولائی کو ہی ہونے ہیں۔کانگریس نے درخواست میں کہا ہے کہ ایک ہی دن دونوں سیٹوں پر الگ الگ انتخابات کرانا غیر آئینی اور آئین کی روح کے خلاف ہے۔