بھٹکل 29/جون (ایس او نیوز) ضلع شمالی کینرا کے ڈپٹی کمشنر ڈاکٹر ہریش کمار نے اپنے ایک اخباری بیان میں کہا ہے کہ کورونا وباء کی بگڑتی ہوئی صورت حال کے پیش نظر ریاستی حکومت نے لاک ڈاؤن قوانین میں مزید سختی برتنے کا فیصلہ کیا ہے۔جس کے تحت آئندہ 5جولائی سے 2 اگست تک ہر اتوار کے دن ضلع بھر میں مکمل لاک ڈاؤن رہے گا۔ اس کے علاوہ رات 8بجے سے صبح 5 بجے تک امتناعی احکامات لاگو رہیں گے جس کی پابندی کرنا ہر ایک کے لئے ضروری ہے۔
ڈی سی کی طرف سے آج 29جون کو جاری بیان کے مطابق رات میں امتناعی احکامات اور اتوار کو مکمل لاک ڈاؤن کے دوران صرف اشیائے ضروریہ کی سپلائی اور طبی ضرورت کے لئے گھر سے باہر نکلنے کی اجازت رہے گی۔اس کے علاوہ طبی ضرورت کو چھوڑکر کسی اور کام کے لئے 65 سال سے زیادہ عمر کے لوگوں، حاملہ خواتین، پرانی بیماریوں میں مبتلا لوگوں اور دس سال سے کم عمر بچوں کو ہرگز گھر سے باہر نکلنے کی اجازت نہیں ہوگی۔آئی پی سی کی دفعہ 144کے تحت لاگو کیے گئے ان احکام کی خلاف ورزی کرنے والوں پرپولیس کی طرف سے سخت قانونی کارروائی کی جائے گی۔ بھٹکل اسسٹنٹ کمشنر بھرت نے وضاحت کرتے ہوئے بتایا کہ نائٹ کرفیو 5 جولائی سے لاگو ہوگا جس کے مطابق رات آٹھ بجے سے صبح پانچ بجے تک مکمل بند رہے گا۔
یاد رہے کہ فی الحال بھٹکل اور اتر کنڑا میں رات 9 بجے سے صبح پانچ بجے تک کرفیو جاری ہے، اب 5 جولائی سے رات 8 بجے سے ہی کرفیو جاری ہوجائے گا۔