بنگلورو،29؍مارچ(ایس او نیوز) منڈیا میں جے ڈی ایس امیدوار نکھل کمار سوامی اور آزاد امیدوار سما لتا کے درمیان ٹکراؤ دن بدن شدت اختیار کرتا جارہاہے۔آج سما لتا نے جے ڈی ایس قیادت پر اجارہ داری کا الزام لگاتے ہوئے کہاکہ بھلے وہ منڈیا سے انتخاب جیتیں یا نہ جیتیں لیکن حلقے کے عوام کا دل جیتنے میں انہوں نے کامیابی حاصل کرلی ہیں۔ سما لتا کی تائید میں کھڑے ہوئے دو فلم اداکاروں یش اور درشن کو وزیر اعلیٰ کمار سوامی کی طرف سے کام چور کہنے پر تبصرہ کرتے ہوئے سما لتا نے کہاکہ وزیر اعلیٰ کمار سوامی اور ان کا خاندان شاید ریاست کو اپنے کندھوں پر اٹھایا ہوا ہے، سما لتا نے کہاکہ الیکشن کمیشن کی طرف سے انہیں جو بھی نشان دیا جائے گا اسے وہ اپنے انتخابی مہم کے دوران استعمال کرتے ہوئے اسی کی بنیاد پر کامیابی حاصل کرنے کی جدوجہد کریں گی۔ یہ دعویٰ کرتے ہوئے کہاکہ پورے حلقے میں امبریش کے حق میں ہمدردی کی لہر پائی جاتی ہے اس لہر سے انتخابات میں انہیں بھرپور فائدہ ملے گا ۔ سمالتا نے کہاکہ منڈیا ضلع کے آٹھ جے ڈی ایس اراکین اسمبلی ، تین وزراء ، ضلع کے تمام سرکاری افسر اور مکمل سرکاری مشنری اس حلقے میں نکھل کمار سوامی کو کامیاب بنانے میں لگ گئی ہیں۔اس کے باوجود بھی انہیں یقین ہے کہ وہ حلقے کے لوگوں کو اپنی موجودگی کا احساس کرانے میں ضرور کامیاب ہوں گی۔