سولیا11/فروری (ایس او نیوز) گُونڈیا نامی مقام پر رسوئی گیس سلینڈر پھٹنے سے گھر میں آگ لگنے کا حادثہ پیش آیا ہے۔ گھر کے مالک کانام کرشنا بتایا جاتا ہے۔

موصولہ رپورٹ کے مطابق جب یہ واقعہ پیش آیا تو اس وقت گھر میں کوئی بھی فرد موجود نہیں تھا جس کی وجہ سے کوئی جانی نقصان نہیں ہو اہے۔بتایا جاتا ہے کہ گھر کے تمام افراد کسی تقریب میں حصہ لینے کے لئے شام چار بجے سولیا شہر کی طرف گئے ہوئے تھے۔ آس پاس کے لوگوں نے دیکھا کہ کرشنا کے کھپریل والے مکان کی چھت سے دھواں نکل رہا ہے۔ پھر تھوڑی ہی دیر میں زبردست دھماکہ کی آواز سنائی دی اور گھر کے اندر سے شعلے نکلنے لگے۔

آگ کی وجہ سے گھر کا تمام ساز وسامان جل کر خاک ہوگیا ہے۔گھر کی دیواروں میں شگاف پڑ گئے ہیں اور تقریباً پورا گھر بری طرح تباہ ہوگیا ہے۔ آگ کے شعلے اتنے بلند ہورہے تھے کہ اطراف کے ناریل کے درخت بھی جل اٹھے۔ اس حادثے کی وجہ سے لاکھوں روپے کانقصان ہونے کا اندازہ لگایا گیا ہے۔سلینڈر کے پھٹنے کے اسباب کا ابھی ت کچھ پتہ نہیں چلا ہے۔سولیا فائر بریگیڈ کے عملے نے موقع پر پہنچ کر آگ پر قابو پالیا۔ پولیس نے معاملہ درج کرلیا ہے اور تحقیقات جاری ہے۔