خود کشی کی وارداتوں میں مہاراشٹرا کو پہلا اور کرناٹک کو پانچواں مقام ، میٹر و پالیٹن شہروں میں بنگلورو تیسرے نمبر پر
بنگلورو:20؍جنوری(ایس اؤ نیوز) ملک میں خودکشی کرنے والی ریاستوں میں مہاراشٹرا کو اول مقام حاصل ہوا ہے تو وہیں ریاست کرناٹکا پانچویں مقام پر ہے، جبکہ چار میٹرو پالیٹن شہروں میں بنگلورو خودکشی کرنے کی وارداتوں میں تیسرے نمبر پر ہے جس پر عوام الناس میں سخت تشویش پائی جارہی ہے۔ بے روزگاری ، خاندانی مسائل ، معاشی مسائل سمیت مختلف وجوہات کو لےکر سال 2018میں 11561(8.6فی صد) افراد نے خود کشی کی ہے۔
بنگلورو مہا نگر میں 2082افرادنے خود کشی کی ہیں تو سال 2017میں 2032لوگوں کے خود کشی کئے جانے کی رپورٹ درج ہوئی ہے جس سے موازنہ کریں تو سال 2018میں خودکشی کی وارداتوں میں بنگلور مہانگر میں 2.5فی صد کا اضافہ ہواہے۔ میٹرو پالیٹن شہر چنئی میں 2102 لوگوں نے خودکشی کی ہے تو وہیں دہلی میں2369 افراد نے مختلف وجوہات کے چلتے خود کشی کی ہیں۔
ریاست کرناٹک میں 23.2فی صد کسانوں نے خود کشی کی ہے۔ اس طرح زراعت کے میدان میں خود کشی کرنے والوں کی فہرست میں ریاست کو دوسرے نمبر پرہے۔ کاروبار کے میدان میں مصروف افراد میں سے 13.9فی صد لوگوں نے خود کشی کی ہے، جس میں کاروبار میں نقصان ، قرض کادباؤ سمیت کئی ایک وجوہات شامل ہیں۔ ریاستوں کی فہرست میں مہاراشٹرا اول نمبر پر ہے تو کرناٹک پانچویں مقام پر ہے۔
ریاست میں سال 2016سے 2018تک خود کشی کرنےو الوں میں 7فی صد کا اضافہ ہواہے۔حالانکہ 2016میں 8.2فی صد اور 2017میں 9فی صد تک اضافہ ہواتھا۔ بے روزگاری سے پریشان افراد میں سے 1094(8.5فی صد) لوگوں نے خود کشی کی ہے۔ بیماری اور صحت کی وجہ سے 3180(27.5فی صد) لوگوں نے ، 137سرکاری ملازمین ، پرائیویٹ کام کرنے والوں میں 760 افراد اور 755(7.5فی صد)طلبا نے خود کشی کی ہے۔
اسی طرح سال 2018میں 218لوگ شراب کے نشے میں سواری چلاتے ہوئے ہلاک ہوئے ہیں تو بجلی گرنے سے 126لوگ موت کا شکار ہوئے ہیں۔ حادثات میں ہلاک ہونے والی فہرست میں بھی ریاست کو پانچواں مقام حاصل ہے۔ سال 2018میں ہوئے حادثات میں 6.1فی صد افراد فوت ہوئے ہیں تو آگ لگنےکی وجہ سے 86.1 فی صد لوگ جان بحق ہوئے ہیں ۔
ملک میں ہر سال ایک لاکھ سے زائد افراد خود کشی کرتےہیں۔ 2018میں 1،34،516لوگوں کے خودکشی کرنے کےمعاملات درج ہوئے تھے جو سال 2017 کے مقابلے میں 3.6 فی صد زیادہ ہیں۔ قومی جرائم مندرج بیورو (این سی آر بی ) کی طرف سے جاری کردہ فہرست میں یہ تمام جانکاریاں دی گئی ہے۔