لنگائیت کو آزاد دھرم منوانے کے لئے جدوجہد جاری رہے گی: مرکزی حکومت کے خلاف ہائی کورٹ میں چیلنج کرنے لنگائیت عالمی مہا سبھا کا فیصلہ
بنگلورو:20؍جنوری(ایس اؤ نیوز)لنگائیت دھرم کو آزاد دھرم کے طورپر قبول کرنے کی پیش کش کو ٹھکرانے پر مرکزی حکومت کے خلاف عالمی لنگائیت مہا سبھا نے ہائی کورٹ کا دروازہ کھٹکھٹانے کا فیصلہ کیا ہے۔
پچھلی کانگریس حکومت کے دوران لنگائیت دھرم کو آزادانہ مقام دینے ریاستی کابینہ کی منظوری لے کر مرکز کو سفارش کے لئے بھیجاگیا تھا۔ مگر مرکزی حکومت نے لنگائیت دھرم کو آزاددھرم کے طور پر تصدیق کرنے سے انکارکرتے ہوئے سفارش کو رد کردیا تھا، جس کے بعد لنگائیت کے آزاد دھرم کی جدوجہد کو دھکا لگا تھا ۔
لنگائیت کو آزاد دھرم کے طورپر درج کروانے کے سلسلےمیں بنگلورو ، راجا جی نگر کے کیمپے گوڈا ہال میں منعقدہ ’’سالانہ اجلاس عام ‘‘ میں مفصل سوچ بچار کے بعد فیصلہ کیا گیا کہ لنگائیت دھرم کو آزادانہ مقام دینے سے انکار کرنے والی مرکزی حکومت کے فیصلے کو لنگائیت مہاسبھا ہائی کورٹ میں چیلنج کرے گی۔ اور اس سلسلے میں الگ الگ تین رٹ عرضیوں کو بھی داخل کرنے کا فیصلہ لیا گیا۔
لنگائیت مہا سبھا میں اہم ترین فیصلہ لیتے ہوئے اعلان کیاگیا کہ عالمی لنگائیت مہا سبھا ایک غیر سیاسی اور ثقافتی ،مذہبی ادارہ ہے۔ کون کس پارٹی کا حلیف ہے ، کون مخالف ہے اس سے ادارے کا کوئی تعلق نہیں ہے، البتہ لنگائیت تشخص رکھنے والا کوئی بھی لنگائیت مہا سبھا کا ممبر بن سکتاہے۔ لنگائیت کو آزاد دھرم کا مقام حاصل ہونے تک یہ جدوجہد جاری رہے گی۔ رواں سال ہونےو الی مردم شماری میں لنگائیت طبقے کے لوگوں کو علاحدہ شمار کئے جانےکےمتعلق مرکزی حکومت کو میمورنڈم دیا جائے گا۔ اوراس تعلق سے لنگائیتوں میں بیداری پیدا کرنے سمینار، منتھن پروگرام ، ورکشاپ انعقاد کئے جانے کا بھی فیصلہ لیاگیا ۔
ریاست میں لنگائیت دھرم کو مضبوط و مستحکم کرنے ممبران کی تعداد 10ہزار سے 20ہزار کی جائے گی۔ 10اضلاع میں مہاسبھا کی شاخیں قائم کی جائیں گی۔ بقیہ اضلاع اور تعلقہ جات میں شاخیں قائم کرنے کے سلسلےمیں کوشش کی جائے گی۔ ساتھ ہی ساتھ ضلع لیول شعبہ نوجوان، شعبہ خواتین قائم کی جائیں گی ۔ سبھی لنگائیت مٹھوں اور اداروں کو معاون ممبر کی حیثیت سے درج کر لیا جائے گا۔ مٹھا دھیشوں اور لنگائیت طبقے کے مفکروں پر مشتمل ایک رہنمائی کمیٹی تشکیل دے کر اس کو ’انوبھو منٹپ ‘ کے نام سے موسوم کیا جائے گا۔ کوڈل سنگم پنچم سالی پیٹھ کے مرنتونجیا سوامی جی اور عالمی لنگائیت مہا سبھا کے شیوانند جامدار سمیت کئی سوامی جی ، لیڈران ، مفکرین اجلاس میں شریک تھے۔