بنگلورو،13/دسمبر (ایس او نیوز) آل انڈیا اسٹوڈنٹس فیڈریشن (اے آئی ایس ایف) نے تعلیم، روزگار، خواتین کے حقوق کی پامالی، معاشی شعبہ میں گراوٹ اوربے روزگاری کے مسئلہ کو حل کرنے میں ناکام مرکزی حکومت کے خلاف 8/جنوری کو ملک گیر ہڑتال کا اعلان کیا ہے- فیڈریشن کے ریاستی صدر امبریش نے اخباری کانفرنس کے دوران بتایا کہ ملک کی مکمل آبادی میں 50فیصد نوجوانوں کی ہے- لیکن ان نوجوانوں کو روزگار فراہم کرنے میں مرکزی حکومت پوری طرح ناکام رہی ہے- انہوں نے کہا کہ تعلیم، صحت اور مزدور طبقات کو ترجیح دینے سے ہی ملک کی ترقی ممکن ہے- لیکن افسوس کے کسی بھی حکومت نے اس معاملہ میں کوئی دلچسپی نہیں لی جس کی وجہ سے نوجوانوں کا مستقبل تاریک ہوچکا ہے- ملک میں تعلیمی نظام تشویش کا باعث ہے- مرکزی حکومت تعلیم کو فروغ دینے کے بجائے تعلیم کی نجکاری میں اپنی دلچسپی دکھا رہی ہے- انہوں نے بتایا کہ گزشتہ 5برسوں کے دوران کئی یونیورسٹیوں میں ذاتی فسادات بھڑکا کر وہاں کے طلبہ کا اتحاد توڑا گیا ہے- نجکاری اور سماجی بائیکاٹ کے ذریعہ مرکزی حکومت پر تعلیم کو بااختیار بنانے سے روکنے کا انہوں نے الزام لگایا- انہوں نے بتایا کہ دیہی اور شہری علاقوں میں بے روزگاری بڑھنے لگی ہے- روزگار نہ ملنے سے گزر معاش کافی مشکل ہوچکا ہے- جس سے کئی مسائل اٹھ کھڑے ہیں - ان تمام مسائل کے حل کی مانگ کو لے کر مرکز کی توجہ اس جانب مبذول کرنے کے مقصد سے مرکزی حکومت کے خلاف ہڑتال کرنے کا فیصلہ کیا ہے- انہوں نے ہڑتال کے لئے بھر پور تعاون کی گزارش کی- اخباری کانفرنس میں طلبہ، خواتین اور نوجوانوں کی تنظیموں کے عہدیدار حاضر تھے-