بھٹکل 21/اپریل (ایس او نیوز) بھٹکل میں لاک ڈاون کے چلتے پولس کی جانب سے سخت جانچ کی جارہی ہے اور غیر ضروری طور پر گھروں سے باہر گھومنے والوں پر کاروائیاں ہورہی ہیں۔ شمس الدین سرکل، اولڈ بس اسٹائند اور دیگر ناکوں پر پولس کی جانب سے سخت سیکوریٹی انتظامات پہلے سے ہی تھے مگر اب مدینہ کالونی اور جامعہ آباد روڈ سمیت اندرونی راستوں پر بھی پولس کی سخت نگرانی کئے جانے کی خبر ملی ہے۔
ذرائع نے بتایا کہ جامعہ آباد روڈ، مدینہ کالونی اور موسیٰ نگر وغیرہ میں گذشتہ دو تین دنوں سے پولس مختلف اداروں میں پہنچ کر بھی معائنہ کررہی ہے کہ آیا اُن دفاتر میں سوشیل ڈسٹنس کو برقرار رکھا جارہا ہے یا نہیں اور باہر کے لوگ تو اُن دفاتر میں موجود نہیں ہیں۔خبر ملی ہے کہ پولس نے آج منگل کو بھی ایک دفتر کے اندر پہنچ کر جائزہ لیا۔ لیکن جب دفتر میں موجود ذمہ داران نے بتایا کہ یہاں ہم صرف تین ہی لوگ ہیں تو وہ باہر چلے گئے۔
اسی طرح لاک ڈاون کی خلاف ورزی کرنے کے الزام میں بائک سواروں پر ڈنڈے مارنے اور بعض لوگوں پر معاملات درج کرنے کی بھی خبریں ملی ہیں۔
مدینہ کالونی کے تین لوگوں پر کاروائی: بھٹکل میں سخت لاک ڈاون کے چلتے مدینہ کالونی میں کل پیر کی شام پولس نے تین لوگوں کو اپنی تحویل میں لیا جن کے تعلق سے کہا گیا ہے کہ وہ غیر ضروری طور پر متعلقہ مقام پر گھوم رہے تھے۔کل شام کو پولس تینوں کو ٹاون پولس تھانہ لے گئی تھی مگر بعد میں قریبی علاقہ کے ایک پنچایت رکن کی مداخلت کے بعد تینوں کے ہاتھوں پر چودہ دنوں کا کورنٹائن میں رہنے کا اسٹامپ لگا کر رہا کردیا گیا۔