بنگلورو میں آوارہ کتوں کی وجہ سے عوام پریشان،بی بی ایم پی قابو پانے میں نا کام رواں سال10ہزار سے زائد افراد آوارہ کتوں کے حملہ میں زخمی
بنگلورو،30؍جولائی(ایس او نیوز) بنگلورو شہرمیں آوارہ کتوں کے کاٹنے کے معا ملات میں دن بدن اضافہ ہونے لگا ہے،گزشتہ تین سال سے ابتک شہر بنگلور میں 52ہزار سے زائد افراد آوارہ کتوں کے کاٹنے سے زخمی ہو ئے ہیں۔ یاد رہے کہ گزشتہ سال2020کے دوران آوارہ کتوں کے حملہ سے بری طرح زخمی عورت فوت ہو چکی تھی۔ اس کے علاوہ طلبہ اور عمر رسیدہ افراد پر آوارہ کتوں کے حملہ کے واقعات کو عوام ابھی تک نہیں بھلاپائے ہیں۔بروہت بنگلور مہا نگر پالیکے(بی بی ایم پی) کے مطابق بنگلور شہر میں 3لاکھ سے زائد آوارہ کتے موجود ہیں،کتوں کے حملوں پر قابو پانے کے لئے کئی اقدامات کئے جانے کے باوجود کو ئی فائدہ دکھائی نہیں دیا ہے۔
جنوری2022سے ابتک تقریباً10ہزار افراد پر آوارہ کتوں نے حملہ کرتے ہو ئے زخمی کیا ہے۔جنوری کے ماہ میں 1,677،فروری میں 1,135، مارچ1,600، اپریل کے دوران1,677،مئی کے ماہ میں 1,851،جون کے ماہ میں 1,140اور جو لائی کے ماہ میں ابتک483 افراد کو آوارہ کتوں نے حملہ کرتے ہو ئے زخمی کیا ہے۔گزشتہ تین سالوں سے سلیکان سٹی میں 50ہزار سے زائد افراد آوارہ کتوں کے حملہ کا شکار ہو ئے ہیں۔بتا یا جا تا ہے کہ روزانہ شہر میں 70سے زائد افراد آوارہ کتوں کے حملہ سے زخمی ہو رہے ہیں۔شہر میں آوارہ کتوں کی بھرمار کے باوجود ان پر قابو پانے کے لئے درکار اقدامات کرنے میں بی بی ایم پی نا کام دکھائی دے رہی ہے،جس کی وجہ سے رات دیر گھروں کو لوٹنے والے افراد کو کافی پریشانی کا سامنا کرنا پڑ رہا ہے،اور کئی افراد کتوں کے حملہ سے ڈر کر رات کے اوقات میں مکانوں سے باہر نہیں نکل پا رہے ہیں۔ بی بی ایم پی کو چاہئے کہ وہ شہر میں آوارہ کتوں پر قابو پانے کے لئے درکار اقدامات فوری کرے اور عوام کے دلوں میں جو ڈر وخوف پیدا ہو چکا ہے اس کو دور کرنے کی کوشش کرے۔