بھٹکل 14/جون (ایس او نیوز) بھٹکل میں آوارہ کتوں کے حملوں کا سلسلہ رُکتا نظر نہیں آرہا ہے،   گذشتہ دنوں مُنڈلی میں  چار لوگوں پر  حملے ہوئے تھے جس میں ایک عمر رسیدہ خاتون  کو اپنی جان سے ہاتھ دھونا پڑا تھا اور تین دیگر شدید زخمی ہوئے تھے، اب پھر ایک تازہ حملہ  سامنے آیا ہے جس میں ایک پاگل کتے نے  ایک سوئے  ہوئے شخص پر حملہ کرتے ہوئے اُس کا چہرہ  نوچنے کی کوشش کی ہے۔

اطلاع کے مطابق  بھٹکل مُنڈلی کا  رہنے والا  دُرگپا نائک (67) رات کے اوقات میں کافی عرصہ سے  بھٹکل کے اولڈ بس اسٹائند پر واقع  دکانوں اور باکڑوں کے باہر سوتا ہے، لیکن   جمعرات کو  اُسے دکانوں کے باہر سونا مہنگا پڑ گیا کیونکہ گہری نیند کی حالت  میں اُس پر ایک پاگل کتے نے حملہ کردیا۔  بتایا گیا ہے کہ کتے نے اس کے چہرے کو نوچ کھانے کی کوشش کی ، جس سے  دُرگپا بری طرح زخمی ہوگیا۔ اسے فوری طور پر بھٹکل سرکاری اسپتال لے جایا گیا، جہاں سے اسے  مزید علاج کے لئے مینگلور روانہ کیا گیا ہے۔

خیال رہے کہ مُنڈلی میں اس سے قبل ایک پاگل کتے نے   ایک عمر رسیدہ خاتون   کا بھی چہرہ ہی نوچ کھایا تھا،  عورت کا چہرہ  اتنی بری طرح  نوچا گیا تھا کہ اُس کی  ناک اور منہ کا پورا حصہ جسم سے الگ ہوگیا تھا، اسی کے نتیجے میں اُس کی جان بچائی نہیں جاسکی تھی اور وہ مینگلور میں اگلے روز انتقال کر گئی تھی، اس بار بھی کتے نے  چہرے پر ہی حملہ کیا ہے، مگر غالباً دُرگپا  فوری طور پر کتے کو  بھگانے میں کامیاب ہوگیا جس کی وجہ سے  اُس کا گوشت  چہرے پر سے الگ نہیں ہوا۔ مگر  بتایا گیا ہے کہ دُرگپا بھی شدید زخمی ہوا ہے ۔

بھٹکل میں آوارہ اور پاگل کتوں کے مسلسل حملوں سے شہریوں میں   خوف و ہراس کی لہر دوڑ گئی ہے اور عوام میونسپالٹی حکام  پر زور دے رہے ہیں کہ ان کتوں کو ٹھکانے لگانے  کے تعلق سے   کاروائی کی جائے  اور عوام کو  راحت دلائی جائے۔