بنگلورو: آوارہ کتوں کاحملہ۔ شدید زخمی لڑکااسپتال میں داخل
بنگلورو، 3؍اکتوبر(ایس او نیوز)شہر بنگلورو میں 8سالہ لڑکے پر آوارہ کتوں نے حملہ کرکے شدید طور پر زخمی کردیا۔ اطلاع کے مطابق شہر کے ہوراماؤ کے قریب راجنا لے آؤٹ میں 5کتوں کے ایک گروہ نے کوپل سے تعلق رکھنے والے مزدور کے لڑکے یشونت پر حملہ کردیا۔حملہ میں گردن سمیت جسم کے دیگر 10سے زیادہ حصوں پر زخم آئے ہیں۔ مزید علاج کیلئے لڑکے کو اسپتال میں داخل کیا گیا ہے۔
بتایا جاتاہے کہ اتوار کو اسکول میں گاندھی جینتی پروگرام میں شرکت کے بعد یشونت 11.30بجے گھر واپس ہورہاتھا کہ کتوں نے حملہ کردیا،یشونت کی چیخ وپکار کے بعد مقامی افراد نے اسے بچاکر اسپتال میں داخل کیا۔لڑکے کے والد ایرنا کو اطلاع ملتے ہی وہ فوراً پہنچا اور لڑکے کواسپتال لے گیا۔
اس سلسلے میں بی بی ایم پی کے شعبہ مویشی پالن کے جوائنٹ ڈائرکٹر،روی کمار نے بتایا کہ اس حملہ کی انہیں اطلاع نہیں ہے۔ تاہم کارپوریشن کے قوانین کے مطابق لڑکے کے علاج کیلئے خرچ کی گئی رقم اور معاوضہ کو اداکیاجائے گا۔