بھٹکل 9/مارچ (ایس او نیوز)  بھٹکل مسلم یوتھ فیڈریشن کی جانب سے آج یہاں غوثیہ اسٹریٹ میں ڈرینکنگ واٹر پلانٹ کے لئے  بھٹکل کے  قاضی صاحبان کے ہاتھوں سنگ بنیاد رکھا گیا، اس موقع پر عمائدین قوم سمیت شہر کے کافی نوجوان  موجود تھے۔

اس موقع پر گفتگو کرتے ہوئے فیڈریشن کے صدر جناب امتیاز اُدیاور نے بتایا کہ  شہر میں بعض بینکوں کی جانب سے پینے کے پانی کا پلانٹ  قائم کیا گیا ہے جو   ظاہر ہے مسلمانوں کے لئے وہ پانی پینا جائز نہیں ہے، اسی کو دیکھتے ہوئے  ہم نے شہر کے اہم علاقوں میں ایسے واٹر پلانٹ قائم کرنے کا منصوبہ بنایا جس کے لئے فیڈریشن کی جانب سے  گلف کی مختلف جماعتوں کو خطوط ارسال کئے گئے ہیں ، انہوں نے بتایا کہ غوثیہ اسٹریٹ میں ڈرینکنگ واٹر پلانٹ قائم کرنے کے لئے  بھٹکل مسلم جماعت منطقہ الشرقیہ (سعودی عربیہ) نے  مکمل ذمہ داری لی اور اُن ہی کے تعاون سے یہاں اب کام شروع کیا گیا  ہے ، توقع ہے کہ یکم اپریل کو  اس پلانٹ کا افتتاح ہوگا۔ امتیاز نے بتایا کہ اس واٹر پلانٹ سے نہ صرف غوثیہ اسٹریٹ بلکہ پڑوسی علاقہ منڈلی، نستار  سمیت  دیگر اطراف کے علاقوں کے عوام بھی فائدہ اُٹھاسکتے ہیں۔

امتیاز نے بتایا کہ  غوثیہ اسٹریٹ میں  پمپنگ اسٹیشن  کی وجہ سے یہاں کے سینکڑوں کنویں خراب ہوگئے ہیں، جس کی وجہ سے یہاں کے مکینوں کو پینے کے پانی  کے لئے سب سے زیادہ پریشانی ہورہی تھی، اسی کو دیکھتے ہوئے  یہاں یہ پلانٹ سب سے پہلے قائم کیا جارہا ہے۔امتیاز نے مزید بتایا کہ  پینے کے پانی کے اس پلانٹ کے لئے  بھٹکل مسلم جماعت منطقۃ الشرقیہ بھی یہی چاہتی تھی کہ غوثیہ اسٹریٹ میں چونکہ پینے کے  پانی کا سنگین مسئلہ ہے، اس لئے  اُن کی رقم سے سب سے پہلے یہاں یہ پلانٹ قائم کیا جائے۔ اس کے ساتھ ساتھ ہم  انشاء اللہ پھول بازار، مخدوم کالونی مین روڈ،  آزاد نگر (جالی روڈ) اور مدینہ کالونی میں بھی ہم نے اسی طرح کا پلانٹ قائم کرنے کا منصوبہ بنایا ہے۔ ہماری کوشش ہے کہ پینے کے پانی کے اس پلانٹ سے مسلمانوں کے ساتھ ساتھ غیر مسلم بھی فائدہ اُٹھاسکیں، اس لئے ہم  سبھی علاقوں میں ایسی جگہوں کا انتخاب کررہے ہیں  جہاں سے دوسرے لوگوں کو بھی فائدہ پہنچ سکے۔ جناب امتیاز اُدیاور نے بتایا کہ اس پروجکٹ کے لئے گلف کی مختلف جماعتوں سے تعاون طلب کیا گیا ہے اور اکثر جماعتوں کی جانب سے مثبت  جواب ملا ہے ، اس لئے ہمیں توقع ہے کہ گلف کی ہماری جماعتیں اس کام کے لئے بڑھ چڑھ کر ہمارا تعاون فرمائیں گے اور اس کارخیر میں  ہمارا بھرپور ساتھ دیں گے۔  غوثیہ اسٹریٹ میں غوثیہ مسجد کے احاطے میں ہی مسجد کمیٹی نے اس پلانٹ کو تعمیر کرنے کے لئے جگہ فراہم کی  ہے، جس کے لئے فیڈریشن نے مسجد کمیٹی اور ذمہ داران کا شکریہ ادا کیا۔

غوثیہ اسٹریٹ میں پینے کے پانی کے اس پلانٹ  کی  سنگ بنیاد تقریب میں  قاضی صاحبان مولانا محمد اقبال مُلا ندوی، مولانا خواجہ معین الدین اکرمی مدنی، مولانا  عبدالعلیم قاسمی، مولانا الیاس جاکٹی ندوی،  بھٹکل مسلم جماعت منطقۃ الشرقیہ کے سابق صدر جناب محمد صادق پلّور، انجمن حامئی مسلمین بھٹکل کے جنرل سکریٹری صدیق اسماعیل  سمیت کافی دیگر ذمہ داران موجود تھے، جنہوں نے فیڈریشن کے اس اہم اقدام کی بھرپور سراہنا کی اور  نوجوانوں کو ایسے ہی سماجی کاموں میں مزید بڑھ چڑھ کر آگے بڑھنے کی صلاح دی۔ بھٹکل مسلم یوتھ فیڈریشن کے جنرل سکریٹری محمد نصیف خلیفہ،  سابق جنرل سکریٹری مولانا ایس ایم عرفان ندوی و دیگر سرگرم اراکین بھی موجود تھے۔