بی جے پی کو شکست دینے کے لیے کانگریس سے اب بھی ہاتھ ملانے کو تیار ہے ’آپ‘
نئی دہلی،13؍اپریل (ایس او نیوز؍آئی این ایس انڈیا) آپ نے بی جے پی صدر امت شاہ اور وزیر اعظم نریندر مودی کو ملک کیلئے خطرہ بتاتے ہوئے لوک سبھا انتخابات کے لیے دہلی، ہریانہ اور چنڈی گڑھ میں کانگریس سے اتحاد کرنے کی ہفتہ کو دوبارہ پیشکش کی ہے۔پارٹی نے حالانکہ اس بار اتحاد کے فارمولے سے پنجاب کی مانگ کو ہٹا لیا ہے۔آپ کے سینئر لیڈر اور دہلی کے نائب وزیر اعلی منیش سسودیا نے کہاکہ مودی اور شاہ کی جوڑی ملک کے لئے خطرناک ہے۔اسے روکنے کے لئے آپ تمام بی جے پی مخالف تنظیموں کے ساتھ ہاتھ ملانے کو تیار ہے۔انہوں نے کہاکہ اب بھی وقت ہے، اگر کانگریس چاہے تو مودی اور شاہ کی جوڑی کو 18 سیٹوں (ہریانہ، دہلی اور چندی گڑھ) پر شکست دی جا سکتی ہے۔قابل ذکر ہے کہ آپ ابھی تک پنجاب، ہریانہ اور دہلی کی 33 سیٹوں پر کانگریس کے ساتھ اتحاد کی پہل کر رہی تھی۔آپ نے جمعہ کو ہریانہ میں جن نائک جنتا پارٹی (ججپا) کے ساتھ اتحاد کا رسمی اعلان کیا تھا جبکہ کانگریس نے صرف دہلی میں آپ کے ساتھ اتحادکرنے کی مجبوری کو واضح کر دیا تھا۔ اس کے بعد سسودیا نے اتحاد کو لے کر آپ کے رخ کو واضح کرتے ہوئے کہا کہ ان کی پارٹی ملک کے لیے خطرہ بن چکی شاہ مودی کی جوڑی کو دوبارہ اقتدار میں آنے سے روکنے کے لیے کانگریس سمیت دیگر بی جے پی مخالف جماعتوں کے ساتھ مل کر انتخابات لڑنے کو تیار ہے۔انہوں نے کہا کہآپ نے موجودہ حالات کو دیکھتے ہوئے اتحاد کی پہل کی ہے۔سسودیا نے کہاکہ یہ کانگریس کو طے کرنا ہے کہ اس وقت مودی اور شاہ کی جوڑی کو ہرانے کو ترجیح دینا ہے یا زیادہ سیٹوں پر انتخاب لڑنے کا ریکارڈ بنانا ہے۔انہوں نے حالانکہ اتحاد میں تاخیر کے لیے کانگریس کو ذمہ دار بھی ٹھہرایا۔