بھٹکل انجمن انجنئیرنگ کالج میں سائنس و ٹکنالوجی نمائشی ماڈلس مقابلہ فسٹ’اسٹم 19‘ کا کامیاب انعقاد
بھٹکل:یکم ؍اکتوبر(ایس اؤ نیوز) انجمن حامئی مسلمین بھٹکل کے تحت چلنے والے انجمن انسٹی ٹیوٹ آف ٹکنالوجی اینڈ مینجمنٹ عرف انجمن انجینرنگ کالج بھٹکل میں 30ستمبر 2019بروز پیر کو منعقدہ ایک روزہ سائنس و ٹکنالوجی نمائشی ماڈلس مقابلہ فسٹ’اسٹم 19 کا کامیاب انعقاد کیا گیا جس میں تین ساحلی اضلاع کے 400سے زائد طلبا وطالبات نے شرکت کی اور مقابلے کو کامیاب بنایا۔
اترکنڑا، اُڈپی اور دکشن کنڑا اضلاع کے مختلف کالجوں کے طلبا وطالبات نے فسٹ میں شرکت کرتے ہوئے فزکس ، کیمسٹری، بائیولوجی اور ریاضی پر مشتمل ماڈلس پیش کرتے ہوئے اپنے اپنے ماڈلس کی مکمل معلومات فراہم کی۔ اسی طرح رسمی و غیر رسمی توانائی کے وسائل کو بھی فسٹ میں پیش کیاگیا۔
انجمن حامئی مسلمین بھٹکل کے صدر عبدالرحیم جوکاکو نے فسٹ تقریب کی صدارت کی۔ اس موقع پر ایڈیشنل جنرل سکریٹری محمد اسحاق شاہ بندری، کالج بورڈ سکریٹری ابوبکر قاسمجی ، اسکول بورڈ سکریٹری آصف دامودی ، مجلس اصلاح وتنظیم کے صدر ایس ایم سید پرویز، جنرل سکریٹری مولوی عبدالرقیب ایم جے ، پرنسپال ڈاکٹر مشتاق بھاوی کٹی ، نائب پرنسپال ڈاکٹر پال چندر ، اسٹوڈنٹس سکریٹری صدیق شاہ بندری وغیرہ موجود تھے۔