کرناٹک: ایس ایس ایل سی سپلیمنٹری امتحانات ستمبر میں منعقد کئے جائینگے
بنگلورو،12؍ اگست (ایس او نیوز) ایس ایس ایل سی سپلیمنٹری امتحان آئندہ ماہ ستمبر میں منعقد کئے جانے کا فیصلہ کیا گیا ہے اور دو ایک دن میں امتحان کی تاریخ اور ٹائم ٹیبل کا اعلان کردیا جائے گا۔ یہ بات کرناٹک سکینڈری ایگزامنیشن بورڈ کی ڈائرکٹر وی سو منگلا نے کہی۔
انہوں نے کہا کہ کووڈ۔19 کی وجہ سے 18067طلبہ امتحان کے لئے حاضر نہیں ہوسکے ہیں، انہیں آئندہ سپلیمنٹری امتحان میں نئے طلبہ کے طور پر حاضر ہونے کا موقع دیا گیا ہے انہیں پھر سے داخل کرنی نہیں پڑے گی۔ اس سال امتحان میں ناکام ہوئے طلبہ کو 11؍ اگست سے ہی سپلیمنٹری امتحان کے لئے اپنا نام رجسٹر کرانے کا موقع دیا گیا ہے۔ ان طلبہ کو فیل اور دوسری کوشش کے طور پر قبول کیاجائے گا۔ امتحان میں ناکام طلبہ کو ایک سبجیکٹ کے لئے /320 روپئے، دو سبجیکٹ کے لئے386 روپئے، تین اور اس سے زیادہ سبجیکٹس کے لئے 520 روپئے فیس ادا کرنی ہوگی۔ امتحان کی فیس آن لائن کے ذریعہ ہی ادا کرنی ہوگی۔ جملہ 220 روپئے معہ فائن امتحان فیس وصول کرنے کی آخری تاریخ /24 اگست ہوگی۔ آن لائن پر طلبہ کی تفصیل اپ لوڈ کرنے کے لئے بھی /24 اگست آخری تاریخ مقرر کی گئی ہے۔
سومنگلا نے بتایا کہ جانچ شدہ ایس ایس ایل سی امتحان کے جوابی پرچوں کی اسکیان کاپی حاصل کرنے آن لائن کے ذریعہ عرضی داخل کرنے 11 سے 20؍اگست تک موقع فراہم کیا گیا ہے۔ فوٹو کاپی کیلئے آن لائن کے ذریعہ 405 روپئے فیس ادا کرنی ہوگی۔ چلان کے ذریعہ فیس ادا کرنے والوں کو 410 روپئے فیس ادا کرنے ہوں گے۔ جوابی پرچوں کی دوبارہ جانچ (ریویلیوایشن) کیلئے آن لائن عرضی داخل کرنے 14 تا 24 ؍اگست موقع فراہم کیا گیا ہے۔ اس کے لئے آن لائن کے ذریعہ 805 روپئے اور چلان کے ذریعہ 810 روپئے فیس ادا کرنی ہوگی۔