کرناٹک میں کل جمعہ سے شروع ہورہے ہیں ایس ایس ایل سی امتحانات؛ امتحانات کے پیش نظر بھٹکل نور جامع مسجد میں جمعہ نماز ہوگی 1:55 کو
بھٹکل 30 مارچ (ایس او نیوز) کل جمعہ 31 مارچ سے ریاست کرناٹک میں ایس ایس ایل سی کے بورڈ امتحانات شروع ہورہے ہیں امتحانات صبح 10:30 بجے سے 1:45 بجے تک ہوں گے۔ بچوں کے امتحانات کو دیکھتے ہوئے شہر کے قلب میں واقع نور جامع مسجد میں جمعہ کی نماز 1:55 کو ادا کئے جانے کا فیصلہ کیا گیا ہے۔
جمعرات کو ساحل آن لائن سے بات چیت کرتے ہوئے، بھٹکل بلاک ایجوکیشن آفیسر دیوی داس موگر نے بتایا کہ تعلقہ انتظامیہ نے امتحان کے لیے تمام ضروری تیاریاں مکمل کر لی ہیں۔
انہوں نے بتایا کہ بھٹکل میں سرکاری، امداد یافتہ اور غیر امدادی اسکولوں میں کل 37 ہائی اسکول ہیں۔ 926 لڑکے اور 1131 لڑکیاں، مجموعی طور پر 2110 طلباء اس سال امتحان میں شریک ہوں گے جس کے لئے دس امتحانی مراکز قائم کئے گئے ہیں اور تمام امتحانی مراکز میں طلبہ کے لئے ہر طرح کی ممکنہ سہولیات فراہم کی گئی ہیں۔
انہوں نے بتایا کہ تمام امتحانی مراکز میں سی سی ٹی وی کیمرے نصب کئے گئے ہیں ۔جبکہ حساس امتحانی مراکز کی بھی نشاندہی کی گئی ہے۔
کل جمعہ کو پہلا پرچہ فرسٹ لنگویج ( اُردو، ہندی، انگلش، مراٹھی، تمل ، سنسکرت) کا ہوگا۔ 4 اپریل کو میتھس/سوشیولوجی کا امتحان ہوگا،جبکہ آخری پرچہ 15 اپریل کو سوشیل سائنس کا ہوگا۔
طلبہ سے کہا گیا ہے کہ وہ کرناٹک ایجوکیشن بورڈ کی ہدایات کی مکمل پاسداری کریں۔ جس کے مطابق امتحان میں شریک ہونے کے لئے ہال ٹکٹ کے ساتھ امتحان گاہ میں جانا ضروری ہے، الیکٹرانک آلات کیلکولیٹر یا موبائل، امتحان گاہ میں لے جانے کی سخت ممانعت ہے۔طلبہ سے کہا گیا ہے کہ وہ امتحان کے لئے ضروری چیزیں بالخصوص پین، پینسل وغیرہ ا پنے پاس ضرور رکھیں۔