بھٹکل،25؍جولائی (ایس او نیوز) لاک ڈاؤن کی وجہ سے ملتوی کیے گئے ایس ایس ایل سی کے امتحانات آج سے شروع ہورہے ہیں جس کے پس منظرمیں ہر جگہ امتحانی مراکز کے باہر سخت حفاظتی بندوبست کیا گیا ہے۔
بلاک ایجو کیشن آفیسر ایم آر منجی نے بتایا کہ بھٹکل تعلقہ میں اس مرتبہ جملہ 2051 طلبہ اس امتحان میں شریک ہورہے ہیں۔جن میں 1131لڑکیاں اور 920لڑکے شامل ہیں۔ بھٹکل شہرکے نیو انگلش اسکول، سونارکیری سرکاری ہائی اسکول، اسلامیہ اینگلواردو ہائی اسکول، انجمن گرلز ہائی اسکول کے علاوہ بیلکے سرکاری ہائی اسکول، جنتاودیالہ مرڈیشور، نیشنل ہائی اسکول مرڈیشور، بیناودیا انٹر نیشنل ہائی اسکول میں امتحانی مراکز بنائے گئے ہیں۔ ان تمام 9مراکز میں تمام احتیاطی اور حفاظتی اقدامات کیے گئے ہیں۔ طلبہ کو مفت میں ماسک فراہم کیے گئے ہیں۔ 332 افراد پر مشتمل عملہ امتحانات منعقد کرنے کی ذمہ دای پر لگادیا گیا ہے۔
نوڈل آفیسر پرکاش شیرالی نے بتایا کہ فی الحال کورونا پوزیٹیو نکلے ہوئے جن علاقوں کو کنٹینمنٹ زون قرار دیا گیا ہے ایسے علاقوں سے جملہ 23طلبہ امتحان کے لئے حاضر ہورہے ہیں۔ ایسے طلبہ کے لئے ان کے امتحانی مرکز میں الگ سے کمرہ مہیا کیا گیا ہے۔ماسک، سینیٹائزر، تھرمل اسکریننگ وغیرہ کا پورا انتظام کیا گیا ہے۔ اور ایسا ماحول بنایا گیا ہے کہ طلبہ بغیر کسی جھجھک کے امتحان میں شریک ہوسکیں۔