کاروار10/اگست (ایس او نیوز) امسال ریاست میں ایس ایس ایل سی کے جو امتحانات ہوئے تھے اس کا سامنا طلبہ نے کووڈ وباء کے پس منظر میں ذہنی تناؤ کے ساتھ کیا تھا۔اس کے بعد کافی دنوں سے طلبہ بڑی بے چینی کے ساتھ اپنے نتائج کا انتظار کررہے تھے۔

آج جب امتحان کے نتائج نکلے تو ضلع شمالی کینر اکے لئے ایک خوش خبری یہ رہی کہ سرسی کی طالبہ سنّدھی ہیگڈے صد فی صد مارکس حاصل کرتے ہوئے ریاستی سطح پر پہلا رینک پانے میں کامیاب رہی۔ سنّدھی ہیگڈے ریاست کے ان 6طلبہ میں شامل ہے جنہوں نے امسال 625 مارکس حاصل کرکے اول مقام پایا ہے۔سنّدھی سرسی کے ماری کمبا سرکاری ہائی اسکول کی طالبہ ہے اور مہابلیشور ہیگڈے کی دخترہے۔

امسال ایس ایس ایل سی میں جہاں 6 طلبہ نے پہلا رینک حاصل کیا ہے وہیں پر دوسرا مقام پانے والے طلبہ کی تعداد 11ہوگئی ہے جنہوں نے 624 مارکس حاصل کیے ہیں۔ جبکہ 623مارکس کے ساتھ تیسرا مقام پانے والے 43 طلبہ ہیں اور 622مارکس کے ساتھ چوتھا مقام پانے میں 56طالب علم کامیاب ہوئے ہیں۔

اس مرتبہ ایس ایس ایل سی امتحان کے لئے 8,48,203طلبہ نے رجسٹر کروایا تھا۔ اس میں سے 19,086طلبہ کی حاضری کم ہونے کی وجہ سے انہیں ہال ٹکٹ نہیں دیا گیا۔جبکہ 18,067طلبہ کورونا وباء کی وجہ سے امتحان میں شریک نہیں ہوئے۔اس طرح جملہ 8,11,050طلبہ نے ایس ایس ایل سی امتحان دیاتھا۔